Күндүтүк саныыр үтүө–мааны, амарах дууһалаах, аламаҕай майгылаах, үчүгэйи эрэ түстүүр Бүлүүтээҕи дьахталлар Сэбиэттэрин чилиэннэрэ, оҕо поликлиникатын коллектива, Бүлүү улууһун, куоратын дьаһалталара, “Алгыс” сынньалаҥ киинин, Бүлүү улууһун тэрилтэлэрин үлэһиттэрэ уонна биирдиилээн дьоннорбут!
Күн сирин көрбүт кэрэ –мааны оҕолорбут, күндү көмүс чыычаахтарбыт, инники кэскиллэрбит, олохпут оһуордара оҕолорбут тустарыгар бары күүскүтүн-кыаххытын түмэн, рак ыарыынан ыалдьар оҕолор Аан дойдутааҕы күннэринэн аһымал акция тэрийэн, биһиэхэ көмө оҥорбуккутугар бука бары төрөппүттэр ааттарыттан итиитик-истиҥник махтанабыт.
Эрэнэбит эһиги сылаас сыһыаҥҥытынан сылаанньыйан, кыһамньылаах көрүүгүтүнэн кыаҕыран, күүстээх тылларгытынан кынаттанан, сайаҕас санааҕытынан салайтаран, оҕолорбут олох кытаанах биир кэрдиис кэмин
булгуччу төлө түһэн олус улахан үөрүүлээх, минньигэс мичээр аргыстаах дьоллоох оҕо саастаах дьоһун – мааны дьон буолан тахсан, Дьол сырдык уота алаһа дьиэбитигэр сандаарыччы чаҕылыйыа! Биһиги күүстээх эрэлбитигэр өссө күүс эбэҕит, оҕолорбут минньигэс мичээрдэрин өссө минньитэҕит.
Баҕарабыт эһиэхэ хас биирдиигит дьиэ кэргэҥҥитигэр, тус олоххутугар, күүрээннээх үлэҕитигэр ситиһиилэри, күн сирин кэрэтин-кэскилин, сырдыгын — сылааһын, чэгиэн доруобуйаны, олус дьоллоох олоҕу!
Орто дойду олоҕун кэрэ түгэннэрэ, чаҕылхай кэмнэрэ, үтүмэн үөрүүлэрэ, үрдүк ситиһиилэрэ бука барыта эһигини өрүү күүскэ арыаллаатын, арчылаатын, араҥаччылаатын!
Оҕолор төрөппүттэрэ.