Уйбаан Гоголев-Кындыл аатынан Бүлүүтээҕи библиотекаҕа орнитолог, айанньыт, фотограф, суруйааччы, айылҕаны үөрэтээччи, физика учуутала Иван Ионович Дьячковскайы-Кыталык Уйбааны кытары бэрт интэриэһинэй көрсүһүү буолан ааста. Кыталык Уйбаан бэйэтин оҕо сааһын ойуулуур “Кустугу ситтэрбиэн” диэн кинигэтин уонна бэйэтин олоҕун туһунан кэпсээтэ.
Иван Ионович -Кыталык Уйбаан оҕолоро аҕаларын тылыттан хаһан да тахсыбаттар эбит, аҕа иитиитин араас эйгэтин ааспыттар. 4 оҕону ииппит, бука бары физика үөрэҕин ылыммыттар. Улахан кыыс Роза гражданскай авиация идэлээх, хас да идэлээх, Дубайга ыал буолан олорор. Ваня Москватааҕы Бауман техническай университетын бүтэрбит. Лёня Москватааҕы физико-техническай институкка квантовай физика уонна электроника факультетыгар үрдүк хаачыстыбалаахтык үөрэнэ сылдьар. Кыра кыыс Лиля лицейгэ физмат кылааска үөрэнэ сылдьар. Ийэлэрэ Сардаана Владиславовна саха тыла үөрэхтээх.
Дьэ, ити курдук Иван Ионович барахсан аҕа ытык иэһин толорон, оҕолорун үөрэтэ, үлэлии сылдьарыттан олус үөрэбин. 71 саастаах муҥу муннунан тыырбыт, эрэйи эҥэриттэн тэлбит Кыталык Уйбаан уустук олохтооҕун кинигэтиттэн ааҕан, киинэни көрөн элбэҕи биллибит. Өрүү маннык тэтиэнэхтик сылдьарыгар баҕарабын. Оҕолоро, сиэннэрэ бука бары доруобай, дьоллоох буоллуннар.
Павлина Даниловна Иванова,
Бүлүү оскуолатын бочуоттаах учуутала.