Көмө оҥорор пуун биир дойдулаахпыт СВО-ҕа төннөрүгэр таҥаһынан, малынан-салынан толору хааччыйда

Бу күннэргэ Өкүндү нэһилиэгиттэн байыаннай дьайыыларга кыттар биир дойдулаахпыт уол уоппускаҕа кэлэн дойдутун көй салгынынан тыынан, сахатын аһын амсайан, дьонун-сэргэтин, доҕотторун көрсөн сынньанан барда.


Уоппуската бүтэн СВО-ҕа төннөрүгэр Бүлүү улууһун байыаннай дьайыылар кыттыылаахтарыгар көмөнү оҥорор пуунун волонтердара элбэх таҥаһы, малы-салы туттаран ыыттылар. Амарах санаалаах дьоммут илиилэрин сылааһынан, дууһаларын иэйиитинэн тикпит бэргэһэлэрин, флис көстүүмнэри, халыҥ ыстааннаах байыаннай сону, сиэлтэн өрүллүбүт угунньаны, кэтиинчэлэри, баайыы наскылары, термобельены, тактическай рюкзагы, барыта 30-ча араас утары туттуллар малы-салы, таҥаһы биэрэн, этэҥҥэ эргиллэн кэлэригэр алҕаан атаардылар.

Мария Томская салайааччылаах Бүлүү улууһун көмө оҥорор пуунун волонтердара СВО-ҕа сылдьар биир дойдулаахтаргытыгар куруук күүс-көмө буоларгытыгар барҕа махталбытын тириэрдэбит, элбэх гуманитарнай көмөнү оҥороргут, баһыылкалары ыытаргыт үтүөнэн төнүннүн! Чэгиэн-чэбдик туруктаныҥ, үөрүү-көтүү аргыстаныҥ!

Никифор Петров, Өкүндү нэһилиэгин баһылыга,

Федосия Мандарова, нэһилиэк бэтэрээннэрин Сэбиэтин бэрэссэдээтэлэ.

 

Читайте дальше