“Сулус” спорт комплексыгар «Азия оҕолоро» VIII аан дойдутааҕы спортивнай оонньууларын кикбоксиҥҥа күрэхтэһиитэ буола турар.
Бүлүү улууһуттан кикбоксинг көрүҥэр кыттар Халбаакы оскуолатын 9 кылааһын үөрэнээччитэ Аман Иванов уонна Бүлүү куорат 2 №-дээх оскуолатын 9 кылааһын үөрэнээччитэ Айаал Поскачин «Азия оҕолоро» VIII аан дойдутааҕы спортивнай оонньуулар чемпионнарынан буоллулар, Саха сирин сүүмэрдэммит хамаандатыгар кыайыыны аҕаллылар.
Спортсменнар тириэньэрдэрэ Артур Васильев уонна Георгий Халабышев билиһиннэрбиттэринэн, Айаал Поскачин 54 киилэ ыйааһыҥҥа уонна Аман Иванов 45 киилэҕэ иккилиитэ киирсэннэр финалга таҕыстылар уонна кыайыыны ситистилэр.
«Азия оҕолоро» VIII аан дойдутааҕы спортивнай оонньуулар чемпионнарынан, тириэньэрдэрин дьоһун ситиһиилэринэн эҕэрдэлиибит!
Вячеслав Алексеев,
Николай Куприянов.