С.М. Аржаков 125 сылыгар. Бүлүүгэ кини олоҕун, үлэтин көрдөрөр музей тэриллэригэр этии киллэрэбин.
Бүлүүбүт улууһугар улуу дьоммутун чиэстиир кэммитигэр Степан Максимовиһы эбии билэр тоҕоостоох. Ону мин 10-чалаах оҕо аан бастаан дьон кэпсэтэриттэн бу холкуоспут Аржаков аатын интэриэһиргээн истибитим уонна сэҥээрбитим. Ийэм Петрова М.И. Хаҕыҥҥа бастакы бэтэринээр, тыа хаһаайыстыбатын исписэлииһэ этэ. Аҕам Еремеев Ф.В. бу холкуос Хаҕыннааҕы учаастагар сэбиэдиссэйдиир. Ону бу хаартыскаҕа уҥаттан иккис турарын көрүҥ. Начаалынай кылаастан сайын Чай ферматыгар 100-чэкэ ынахха бостууктаабытым, оҕуруокка үлэлээбитим. Оччоттон дьонум сурутар “Колхоз суола” хаһыаттарыгар С.М. Аржаковы бу холкуостан сылтаан ааҕарым. Кэлин олоҕум устата олох да элбэҕи билбитим.
Ол курдук кини инициативатынан Москваҕа 1920-21 сс. Саха автономиятын олохтуурга олус күүскэ үлэлэспит. Коммунист университетыгар доҕотторо, бииргэ үөрэммиттэрэ: В.С. Синеглазова – Бүлүү к. оборонатын 100-чэкэ күн салайар. Кэлин кыһыллар “Өлүөхүмэҕэ күрүөххэ” диэннэрин кыайар. 300-тэн тахса үрүҥү салгыы баралларын тохтоппут үтүөлээх. Иккис өрүү билсэр киһитэ А.Е. Кугаевскай Верхоянскайга 60-ча өстөөх төгүрүктээһиниттэн төлө көппүт 12 коммунары Бүлүүгэ быһа суола суохха 1000 биэрэстэҕэ аҕалбыт. С.М. Аржаков 4 ый Амма осадатыгар 200-чэкэ кыһылтан үксэ “Дьокуускайга куотуохха” диэн мунньахтарыгар чекист быһыытынан эрэ тохтоппут. Онон 600-чэкэ “өрө турбуту” утары кырыктаах кыргыска кини саа-саадах тутан, гражданскай сэрии хаамыытын чахчы быһаарар. Бу Саха сиригэр элбэх хаан тохтуутун тохтоппута хаһан да умнуллуо суохтаах.
С.М. Аржаков үгүс салайар үлэҕэ үлэлээбитэ, итинтэн Саха сиригэр сир оҥоһуутун наркомунан 1932-37 сс. үлэлээн тахсыылаахтык салайар. Онно Бүлүү Уоттутугар Н.С. Таппагаров нэчимиэн үрдүк үүнүүтүн ылан, Аан дойду рекордун олохтуур. Ону күн бүгүнүгэр диэри Сир үрдүгэр ким да ситэ илик. Өрөспүүбүлүкэҕэ 100-тэн тахса га бааһынаны оҥорторбутун билиҥҥи техника үйэтигэр да ситэ иликпит. Степан Аржаков аатынан совхоз үлэҕэ-хамнаска үрдүк кирбиилэри ситиспитэ биллэр. Итинэн кылгастык түмүктээн эттэххэ, С.М. Аржаков түмэлин Бүлүү куоратыгар тэрийиэххэ диэн этиилээхпин. Степан Аржаков бу музейа кини олоҕун толору көрдөрөр, сырдатар аналлаах. Автономияны, гражданскай сэриини уонна сир оҥоруутун историятын киэҥник көрдөрүөхтээх, МТС, ММС, мелиорация тэрилтэлэрэ ыччакка көстүөхтээхтэр. Кини улахан олоҕун көрөн эдэр ыччат элбэҕи билбэтин билиэҕэ, үлэҕэ-хамнаска кыттыыта, олоххо актыыбынаһа улаатыах этэ. Олоххо оҥорон таһаарыы бары хайысханан лаппа кэҥээн, дойдубут киэҥ кэскиллэниэх этэ буоллаҕа.
Анатолий Петров, РФ суруналыыстарын Союһун чилиэнэ.
1959 с. саас Мастаах үс нэһилиэгин дьоно, Степан Аржаков колхуос саҕана фестивалга түмсэн, Хаҕын кулуубун таһыгар түспүттэр. Фото дьиэ кэргэн архыыбыттан.