Бүлүүлэр сэрии бэтэрээннэрэ Егор Бубякин, Константин Корякин уонна Афанасий Николаев дьиэлэригэр тыыннаах сибэккилэри уурдулар.
Ыам ыйын 7 күнүгэр Кыайыы күнүн иннинээҕи бүлүүлэр үтүө үгэстэрин быһыытынан улуус, куорат салалталара, олохтоохторо, эдэр көлүөнэ өйдөбүнньүк тэрээһиннэргэ кыттан, сэрии бэтэрээннэрэ Егор Петрович Бубякин, Константин Евгеньевич Корякин уонна Афанасий Иннокентьевич Николаев үтүө олохторун, хорсун быһыыларын, улуус сайдыытыгар кылааттарын ахтан-санаан аастылар, олорбут дьиэлэригэр тыыннаах сибэкки уурдулар.
Улуус, куорат Бочуоттаах олохтооҕо, элбэх бойобуой уордьаннар кавалердара Егор Петрович Бубякин уоттаах сэриигэ хорсуннук сэриилэспитэ, улуус сайдыытыгар, эдэр көлүөнэни иитиигэ сүҥкэн кылаатын киллэрбитэ.
Хорсунун иһин элбэх бойобуой уордьаннардаах, мэтээллэрдээх Константин Евгеньевич Корякин Кыһыл Болуоссакка Кыайыы Парадын кыттыылааҕа, эйэлээх олоххо үөрэҕириигэ, спорка биллэр-көстөр кылаатын киллэрбитэ.
Афанасий Иннокентьевич Николаев Бүлүү үс хотойдоругар: Алексей Мироновка, Николай Кондаковка, Николай Степановка ССРС Геройдарын үрдүк аата иҥэриллэригэр улахан үтүөлээх. Итини тэҥэ, кини Уус Алдан буойуна Михаил Стрекаловскайга Герой аата иҥэриллэрин ситиспитэ. Афанасий Иннокентьевич архыыптарга хасыһан, элбэх докумуоннары үөрэтэн Бүлүүттэн сэрии кыттыылаахтарын тустарынан «Память» кинигэ хас да томнарын суруйан таһаарбыта.
Тэрээһиннэргэ кыттыбыт Бүлүү улууһун баһылыга Сергей Винокуров, куорат баһылыга Ян Попов, оройуон Сэбиэтин бэрэссэдээтэлэ Гаврил Корякин, Бүлүү куорат Сэбиэтин бэрэссэдээтэлэ Николай Харлампьев, улуус сайдыытыгар кылааттарын киллэрбит бэтэрээннэр Федор Николаев, Иван Волков хорсун буойуннар, үтүө үлэһиттэр тустарынан үтүө өйдөбүл үйэлэргэ хаалыаҕын, олорбут олохторо эдэр көлүөнэҕэ холобур буолуоҕун бэлиэтээтилэр.Өйдөбүнньүк тэрээһиннэргэ Ил Түмэн депутата, оройуоннааҕы балыыһа кылаабынай бырааһа Егор Григорьев кыттыыны ылла.
Е.П.Бубякин уола Геннадий Егорович, К.Е.Корякин балта Валентина Егоровна Петрова, А. И. Николаев уола үтүөлээх архитектор Иннокентий Афанасьевич Николаев истиҥ махтал тылларын эттилэр.
Бүлүүгэ Улуу Кыайыы 79 сылын бэлиэтээһин чэрчитинэн элбэх сэргэх тэрээһин ыытыллара быланнанар.
Николай Куприянов.