Кириһиэнньэ күн Лүҥкэ ураты ыраас, эмтээх уута…

Лүҥкэ күөл Кыргыдай нэһилиэгиттэн сэттэ аҥаар килэмиэтиртэн ордук ыраахха сытар Эбэ буолар.

Лүҥкэ — тыа ортотугар нэлэһийэн сытар төгүрүк күөл. Дьиктитэ диэн төгүрүк таас түһэн күөл үөскээбитин курдук көстүүлээх. Урукку кэмтэн кэпсииллэринэн, аралыйар ыраас уулаах, айгыр-силик айылҕалаах, ураты дьикти салгыннаах чуумпу Эбэ. Хоту өттө үрдүк, буор кутуллубутун курдук боллох, соҕуруу өттө намыһах. Бу Эбэ дьэҥкир уута, күөх өҥнөөх бадараана эмтээх үһү диэн ыраахтан кэлэн үөрэппиттээхтэр. Куртах, илии бааһа, ис ыарыыта үтүөрбүт түгэннэрэ үгүстэр. Сааскы кэмҥэ ичигэскэ оҕолор, эдэрдэр, тэрилтэнэн үлэһиттэр баран сынньанан кэлээччилэр. Сайыҥҥы кэмҥэ уута, бадараана элбэх буолан сырыыта эрэйдээх.
Кириһиэнньэ күн, тохсунньу 19 күнүгэр, Кыргыдай нэһилиэгин олохтоохторо, бураннаах эр хоһууттар сарсыардаттан хара киэһээҥҥэ диэри сибэтиэй ууттан бэрсиһиннэрээри кыһыҥҥы суолунан сыбыытаһаллар.

Ол курдук, сарсыарда эрдэ туран анньыыларын ылан, элбэх бидон тиэнэн Майоров И.В., Никифоров Н.Д. буранынан баран Лүҥкэ ыраас уутуттан ылан, хас да ыалы күндүлээтилэр: «Сыл аайы дьон барыта сылдьар. Оннук үөрэнэн хаалбыппыт, тохсунньу 19 күнүгэр баран уу ылабыт. Саас эмиэ сылдьааччыбыт. Эмтээх диэн атын сиртэн кытта үлэһэллэр».

Хас биирдии ыалга урут уруккуттан үгэс быһыытынан киирэн, бүгүн эмиэ айылҕалыын алтыһыы күнэ буолла. Ийэ айылҕаттан күүс-уох ылыныы, өйү-санааны чэбдигирдии, ыраастаныы.

Киһи сөҕүөх , Лүҥкэ Эбэбит ып-ыраас уута хас да сылы быһа иһиккэ кутуллан турбутун да иһин сибиэһэй туругун сүтэрбэт, сытыйбат уратылаах. Эмтээх диэн истиһэн ыраах улуустан ылларааччылар эмиэ бааллар. Аймахтарбытыгар, чугас дьоммутугар, ыраах сиргэ олорооччу доҕотторбутугар кэһии быһыытынан бэрсэр биир үтүө үгэспит умнуллубат. Лүҥкэбит дьэҥкир уута хас биирдии ыалга чэбдик туругу эрэ аҕаллын.

Василиса Окоемова.