«ИнформУИК» бырайыак түмүктэнэр күннэригэр Бүлүү улууһун 34 учаастактааҕы быыбардыыр хамыыһыйаларын 102 чилиэннэрэ мобильнай сыһыарыыга ыйыллыбыт бүтэһик дьиэлэри кэрийэ, быыбардааччылары көрсө сылдьаллар. Кинилэр хас биирдии быыбардааччыга тиийэн РФ Бэрэсидьиэнин быыбарын билиһиннэрэллэр, телефон анал мобильнай сыһыарыытыгар киирбит ыйытыктары биэрэллэр. Бырайыак кулун тутар 7 күнүгэр түмүктэниэхтээх.
Улууска быыбардааччылары дьиэлэригэр көрсүһүүнү бастакынан Андрей Николаев бэрэссэдээтэллээх Хаҕын 170 №-дээх быыбардыыр хамыыһыйата кулун тутар 2 күнүгэр түмүктээбитэ.
Быыбар ситимигэр өр сылларга үлэлээбит Алексей Руфов курдук биир уопуттаах салайааччылаах 161 №-дээх учаастактааҕы быыбардыыр хамыыһыйа быыбардааччыларга сылдьааччылара кулун тутар 3 күнүгэр Кыадаҥда олохтоохторун «ИнформУИК» бырайыак чэрчитинэн сотору кэминэн тэриллиэхтээх РФ Бэрэсидьиэнин быыбарын туһунан билиһиннэриини түмүктээтилэр.
Хамыыһыйа үс кэрийээччилэрэ: бэрэссэдээтэл Алексей Руфов, солбуйааччы Олимпиада Рыкунова уонна сэкэритээр Денис Осипов 43 дьиэҕэ сылдьан 95 быыбардааччыны сирэй көрсөн, быыбар туһунан матырыйааллары туттардылар, быыбар кулун тутар 15-17 күннэригэр тэриллэрин, РФ Бэрэсидьиэнин дуоһунаһыгар хандьытааттары билиһиннэрдилэр, ким ханна куоластыырын туоһуластылар.
— Кулун тутар 3 күнүгэр, сарсыарда, телефон «ИнформУИК» мобильнай сыһыарыытыгар ыйыллыбыт дьиэлэригэр барыларыгар сырыттыбыт, быыбардааччылары кэрийиини түмүктээтибит.
Быыбардааччылар үксүн РФ Бэрэсидьиэнин дуоһунаһыгар хас хандьытаат, ким турбутун ыйыталаһаллар, быыбарга кыттар санаалаахтарын биллэрэллэр. Биһиги телефон мобильнай сыһыарыытыгар сурулла сылдьар ыйытыктары биэрэбит.
Урукку быыбардарга 3 ытыктабыллаах кырдьаҕастарбыт дьиэлэригэр куоластыыллара. Билиҥҥитэ дьиэҕэ куоластыыр баҕалааҕын биир эрэ саастаах быыбардааччыбыт биллэрдэ. Күн-дьыл үчүгэй буоллаҕына, икки ытык кырдьаҕастарбыт сааскы салгынынан тыына таарыйа, быыбардыыр учаастакка бэйэбит тиийэн дойду сүрүн быыбарыгар куоластыахпыт диэн санааларын этиннилэр.
Мобильнай сыһыарыыбыт сороҕор сүтэн хаалан долгутан ылар, сорох аадырыстарга сылдьыбыт диэн бэлиэтиир уонна кэпсэппит дьоммут ааттарын көрдөрбөт. Санаабар, бырайыак түмүктэниитэ, орун-оннун булан иһиэҕэ.
Быыбар күн ханна баар буолар сирдэригэр куоластыахтаах дьону билсэ сылдьабыт, быыбардыыр хамыыһыйа үлэтин саҕалаата да ити боппуруоһу ылсыахпыт, — диэн УИК бэрээссэдээтэлэ Алексей Руфов билиһиннэрдэ.
Эмиэ кулун тутар 3 күнүгэр Вероника Харлампьева курдук быыбар ситимигэр биир уопуттаах салайааччылаах Баппаҕаайы 155 №-дээх учаастактааҕы быыбардыыр хамыыһыйатын кэрийээччилэрэ бөһүөлэк бары дьиэлэригэр сылдьан, быыбардааччылары көрсөн, «ИнформУИК» бырайыагы түмүктээтилэр.
— Дьиэлэргэ сылдьыыны, быыбардааччылары көрсүһүүлэри олунньу 17 күнүттэн саҕалаабыппыт уонна кулун тутар 3 күнүгэр бүтэһик аадырыстарга сырыттыбыт. 169 аадырыһы икки кэрийээччи 56-лыы, биир – 57-лии үс буолан үллэстибиппит. Барыта 400-һү кыайбат быыбардааччылары көрүстүбүт. Биһиги хамыыһыйаттан «ИнформУИК» бырайыакка мин, солбуйааччым Сардаана Алексеева уонна чилиэн Елена Николаева кытынныбыт. 15 быыбардааччы дьиэлэригэр куоластыыр баҕалаахтарын биллэрдилэр, — диэн Вероника Харлампьева кэпсээтэ.
Эмиэ кулун тутар 3 күнүгэр Чочутааҕы 171 №-дээх УИК чилиэннэрэ, «ИнформУИК» бырайыак кыттыылаахтара быыбардааччылар дьиэлэригэр сырыылары, көрсүһүүлэри түмүктээтилэр. УИК бэрэссэдээтэлинэн уопуттаах салайааччы Александра Лаврентьева ситиһиилээхтик үлэлии сылдьар.
Бу күннэргэ улуус бары УИК-тара «ИнформУИК» бырайыагы түмүктүөхтэрэ.
Николай Куприянов