Саха сиригэр, Бүлүү улууһугар күн-күбэй ийэлэри алтынньы 20 күнүгэр өрө тутан чиэстиир, үтүө тыллары аныыр, тыыннаах сибэкки бэлэхтиир буоллахтарына, Бүлүү улууһун саамай кыра бөһүөлэгэр, биллиилээх судаарыстыбаннай диэйэтэл Гавриил Иосифович Чиряев дойдутугар – Кыадаҥдаҕа «Ийэлэр күннээҕэр сырдыктар» тэрээһин нэдиэлэ устата ыытыллыаҕа.
Итинник уһун кэмҥэ ыытыллар араас өрүттээх сонун тэрээһиннэри Кристина Буслаева дириэктэрдээх Н.Х.Константинов аатынан «Күндэ» сынньалаҥ киинэ тэрийэн ыытар.
Алтынньы 21 күнүгэр Кыадаҥда күн-күбэй ийэлэрэ, эбээлэрэ чөл олоҕу тутуһарга ыҥыран, доруобуйаны чэгиэн оҥорорго сибиэһэй салгыҥҥа хаалыктаах хааман дьарыктанан, араас эрчиллиилэри оҥорон олус диэн дуоһуйдулар.
Алтынньы 22 күнүгэр ийэлэргэ, эбээлэргэ Екатерина Михайлова уона Василина Тараховская макраме баайыыга маастар-кылаас ыыттылар. Ийэлэр, эбээлэр бэйэлэрэ баайыы косметичка иистэнэн, саҥаны баһылаан астыннылар.
Алтынньы 23 күнүгэр ийэлэр, эбээлэр хамаанданан өй-толкуй оонньуутугар кыахтарын холонуохтара.
Алтынньы 24 күнүгэр «Кынат» эко-пиэрмэ салайааччыта Мария Иванованы кытта «Амтаннаах ас» көрүҥҥэ кыттан ас арааһын астыахтара.
Алтынньы 25 күнүгэр «Күндэ» сынньалаҥ киинигэр Ийэ нэдиэлэтин түмүктүүр дьоро киэһэҕэ ырыа-тойук, үҥкүү-битии ньиргийиэ, кыттааччылары көрдөөх оонньуулар кэтэһиэхтэрэ, астаах-үөллээх сандалы тула сэргэх сэһэргэһии ыытыллыа, спринт-лотерея оонньонуо.
Ити курдук, Бүлүү улууһун Кыадаҥдатыгар ийэлэргэ, эбээлэргэ аналлаах олус интэриэһинэй уонна көхтөөх тэрээһиннэр ыытылла тураллар. Айымньылаахтык үлэлиир «Күндэ» Сынньалаҥ киинэ ыытар тэрээһиннэригэр Кыадаҥда уонна Чочу күн-күбэй ийэлэрэ, эбээлэрэ үөрүүнэн кыттыыны ылаллар.
Николай Куприянов,
Кристина Буслаева фотолара.