Соторутааҕыта ыччат библиотекатыгар өрөспүүбүлүкэтээҕи лиссиэй — интэринээт төрөөбүт тылы билиигэ көҕүлүүр «КҮН» диэн оҕолор түмсүүлэрин чилиэннэрин кытта улуус үөрэнээччилэрин көрсүһүүтэ буолан ааста.
Уопсайа 14 оскуолаттан 120 үөрэнээччи, БППК устудьуоннара, учууталлар, оскуола салайааччылара, уопсастыбаннай хамсааһыннар, үөрэх салалтатын начальнига Н.М.Семенова, Бүлүү куорат баһылыга Я.А. Попов кытыннылар. Ол курдук өрөспүүбүлүкэтээҕи лиссиэй-интэринээт (РЛИ) 6 үөрэнээччилээх хамаандатыттан үһэ биһиги гимназиябыт выпускниктара буолаллара үөрдэр. Гоголев Евгений 11 — гуманитарнай кылаас, Слепцов Альсен — 10 биолого-химическэй кылаас, Татаринов Артем 10 математическай кылаас үөрэнээччилэрэ. Салайааччы РЛИ математика учуутала, эмиэ биһиги гимназиябыт выпускнига Сафонов Степан Васильевич.
Ыччат библиотекатын икки этээһинэн күн устата оҕолор сахалыы сайа кэпсэтэн, сүбэлэрин холбоон, бэйэбит саастыылаахтарбытын төрөөбүт тылы билиигэ, сахалыы ыраастык саҥарыыга хайдах гынан көҕүлүүбүт, сайыннарабыт диэн тиэмэ тула бырайыактары оҥордулар.
Гимназия аатыттан 10 аб кылаас үөрэнээччилэрэ, төрөппүт кэмитиэтин бэрэссэдээтэлэ Т.И.Архангельская, саха тылын учуутала Л.В.Семенова, гимназия дириэктэрэ Д.К. Федотов көхтөөх кытыннылар. Оҕолор бырайыактыыр кэмнэригэр улахан дьон төгүрүк остуол тула түмсэн, бүгүҥҥү күҥҥэ ийэ тыл кыһалҕаларын туһунан кэпсэттилэр, сайдар суолун торумнастылар. Тэрээһин түмүгэр оҕолор араас кэрэхсэбиллээх бырайыактарын көмүскээн, элбэх доҕоттордонон, «КҮН» саҥа чилиэннэрэ буолан, бэркэ сэргэхсийэн тарҕастылар.
Бүлүүтээҕи гимназия пресс-киинэ.