Чочуга “Күнчээнэ” уһуйаан 65 сыллаах үбүлүөйүн чэрчитинэн иитээччилэр ортолоругар “Педагог ДОУ-2024” педагогическай үлэ бэтэрээнэ,уһуйааҥҥа өр сылларга иитээччинэн үлэлээбит Егорова Любовь Петровна аатыгар анаан үрдүк таһымҥа ыыттылар.
Иитээччилэр таһымнара үрдүгүн бэлиэтии көрдүбүт, тэҥ баайыылаах эдэр үлэһиттэр бэркэ кытыннылар. Кыадаҥда уһуйаанын иитээччитэ Захарова Мария Федоровна кыайыылаах үрдүк аатын ылла.
Любовь Петровна балта Лидия Дмитриевна, кыыһа Александра Николаевна улаханнык долгуйан туран, уһуйаан иитээччилэригэр истиҥ-иһирэх махталларын эттилэр, сэмэй бэлэхтэрин туттардылар. Сиэн кыыс Егорова Милена элбэх ырыа куонкурустарын кыайыылааҕа, эбэтин курдук ырыаһыт эбит, наһаа үчүгэй ырыаны бэлэхтээтэ.
Өр сылларга бииргэ алтыһан үлэлээбит дьүөгэлэрэ Марфа, Любовь Прокопьевналар, Вера Андреевна, Зинаида Алексеевна олус истиҥ ахтыылары оҥордулар, Куонкуруһу биһиги астына көрдүбүт, үтүө-мааны дьоннорбутун маннык санаан, өйдөөн ааһар үтүө үгэһи тэрийдилэр.
Уһуйаан иитээччилэригэр, үлэһиттэригэр, салайааччы Альбина Михайловна
Николаеваҕа инники үлэҕитигэр өссө үрдүк ситиһиилэри, кытаанах доруобуйаны баҕарабыт.
Любаны кытта мин базовай оскуолаҕа бииргэ үөрэммитим. Кини оҕо эрдэҕиттэн көрдөөх, үөрүнньэҥ этэ. Оскуолабыт тиэргэнигэр скакалкалыыр, өрүс биэрэгэр сыырдаан оонньуур этибит. Кэлин Чочуга кэлэн эмиэ бииргэ ыаллаһан олорбуппут. Олоҕун доҕоро Николай Ефремовичтыын элбэх оҕолонон, сиэннэри көрөн өр сылларга эйэлээхтик олорбуттара, үлэни өрө туппут, активнай позициялаах ыал этилэр. Кинилэр ситэри олорботох олохторун оҕолоро, сиэннэрэ салҕыахтара, дьон-сэргэ да мэлдьи ытыктыы, саныы сылдьыахпыт.
Федора Николаева.