Олунньу 4-5 күннэригэр Бүлүү куоратын Н.С.Степанов аатынан 3-с №-дээх оскуола тэрийиитинэн Улуу Кыайыы 80 сылынан, Саха сиригэр Ийэ дойдуну көмүскээччи сылынан, Россияҕа Аҕа дойдуну көмүскэээччи сылынан, Саха сирин уонна Бүлүү улууһун сайдыытыгар кылааттарын киллэрбит дьоҥҥо аналлаах «Саха Саарыннара — 2025» өрөспүүбүлүкэтээҕи конференция түбүктээх үлэтин түмүктээтэ.
Бу тэрээһин үөрэнээччигэ төрөөбүт дойдутугар бэриниилээх, сиэр-майгы өттүнэн иитиллиилээх буолуутугар, үлэ киһитигэр, Ийэ сиргэ убаастабыллаах сыһыан кыра сааһыттан иҥэрэр сыаллаах-соруктаах тэриллэр. Урукку кэмҥэ массыынанан айаннаан киирэр буоллахха, билигин аныгы олох ирдэбилинэн, интэрниэт өҥөтүн толору туһанан оҕолор «Сферум» нөҥүө олорон 155 үөрэнээччи үлэтин кэпсээтэ. Оҕолор экспертэр ыйытыыларыгар сиһилии эппиэттээтилэр, дакылааттарын көмүскээтилэр. Ыраах нэһилиэктэр интэрниэттэрэ мөлтөх буолан, баран хаалан, илин-кэлин киирии-тахсыы, сорох үлэ презентацията ситэри көстүбэтэх, саҥалара иһиллибэтэх түгэннэрэ элбэхтэр. Ол эрэн экспертэр оҕо, учуутал үлэтин сыаналаан, кэтэһэн, истибэтэх оҕолорун толору истэн, ырытан, сөптөөх сыанабылы биэрдилэр, сыралаахтык үлэлээтилэр.
Д.А.Гуляев аатынан Кыргыдай орто оскуолатыттан дакылаат хайысхатыгар уопсайа 16 оҕо кыттыыны ылбытыттан 10 үөрэнээччи кыайыы-хотуу үөрүүтүн аҕалла. Ол курдук, алын сүһүөх оҕолоро: Скрябина В. 1 кыл. — 1 миэстэ (сал. Окоемова В.Г.), Александрова М. 1 кыл. — 3 миэстэ (сал. Окоемова В.Г.), Наумова С. 2 кыл. — 2 миэстэ ( сал.Чыбыкова О.С., Наумова Е.С.), Мучурунов С. 4 кыл. — 3 миэстэ (сал. Александрова С.С.); Орто сүһүөх үөрэнээччилэрэ: Игнатьев Э. 5 кыл. — 1 миэстэ ( сал.Окоемова В.Г.), Наумов С. 5 кыл. — 2 миэстэ ( сал.Чыбыкова О.С., Наумова Е.С.), Соловьева Н. 7 кыл. — 1 миэстэ ( сал.Окоемова В.Г.), Кырбасова Н. 7 кыл.- 3 миэстэ ( сал.Алексеева А.Д., Кырбасова Р.Н.); Үрдүкү сүһүөххэ: Николаева Д. 10 кыл. — 3 миэстэ ( сал.Алексеева М.Н., Игнатьева А.С), Иванов В. 10 кыл. — 3 миэстэ ( сал.Чыбыкова О.С., Наумова Е.С.). «Уоланнар ааҕыылара» хайысхаҕа 40 бөлөх кыттыыны ылла. 5 кылаас уолаттара Игнатьев Э., Иннокентьев С., Наумов С. ( сал.Осипов Е.С., Окоемова В.Г.) бочуоттаах 2 миэстэҕэ тигистилэр.
Ити курдук, үлэһит дьон туһунан, дьоруой, бэтэрээн бойобуой суолларын арыйар элбэх үлэни иһиттибит. Киһи эрэ кэрэхсээн, киэн туттар.
Биһиги оскуолабыт сахалартан бастакы снайпер, снайперскай хамсааһыны аан бастаан төрүттээбит, элбэх снайперы үөрэппит Дмитрий Алексеевич Гуляев аатын 2005 сыл ыам ыйын 4 күнүттэн сүгэр. Д.А.Гуляев 122 өстөөҕү самнарбыт буойуммутун, хомойуох иһин, Геройга тэҥнээх эрэ диибит. Кыайыы 80 сылын көрсө Бүлүү улууһа туруорсан, Дмитрий Гуляевка Герой үрдүк аатын иҥэрэргэ үлэни ыытыаҕа диэн эрэнэбит.
Хорсун хоодуот, үлэһит дьон аатын үйэтитэр, маннык чаҕылхай, хас сылын аайы ыытыллар «Саха Саарыннара» тэрээһин өссө сайдан, өрөспүүбүлүкэ араас муннуктарыттан үөрэнээччилэри, учууталлары түмэ, ыҥыра турдун.
Василиса Окоемова.