Олунньу 14 күнүгэр Кыргыдай нэһилиэгэр С. Н. Каратаев — Ырыа Дыгыйар аатынан «Туску» норуот айымньытын дьиэтигэр Арассыыйаҕа Аҕа дойдуну көмүскээччи, Саха Өрөспүүбүлүкэтигэр Ийэ дойдуну көмүскээччи, Бүлүү улууһугар Гавриил Иосифович Чиряев, Улуу Кыайыы 80 сылыгар аналлаах «Эйэ, дьол иһин» 2025 сылы өрө көтөҕүллүүлээхтик арыйыы буолла.
Сэрии, уоттаах сэрии…Баҕар эргиллиэм…Баҕар өлүөм… Аан дойдуну атыйахтаах уу курдук аймаабыт, мөлүйүөнүнэн киһини суох гыммыт, үгүс куораты, дэриэбинэни эспит алдьархайдаах сэрии түмүктэммитэ, Улуу Кыайыы буолбута номнуо 80 сылын туолар. Сырдык күҥҥэ, эйэлээх олоххо тиэрдибит бар дьоммутугар сүгүрүйүү күнэ.
Тэрээһин Аҕа дойду Улуу сэриитигэр тыыннарын толук уурбут биир дойдулаахтарбыт пааматынньыктарыгар сиэрдээхтик сүгүрүйүү, дириҥник махтаныы бэлиэтэ — гирлянда ууруутуттан саҕаланна. Сэрии сылын оҕолоро Е.Г. Николаева, Т.И. Николаева, А.К. Алексеева, Т.В. Абрамова эдэрдэри кытта тэҥҥэ, тымныыны аахсыбакка, бу үөрүүлээх күҥҥэ ытык ыалдьыт буолан бу үрдүк чиэһи толордулар.
Ыраас халлааны аҕалбыт буойуннарга сүгүрүйэн оскуола оҕолоро байыаннай хаамыынан чиҥник үктэнэн киирдилэр. Биир мүнүүтэ тохтобул, Россия, Саха сирин өрөгөйүн ырыатынан бука бары сүһүөххэ туран киэн туттан ыллаатыбыт. 
«Кыргыдай нэһилиэгэ» МТ баһылыгын солбуйааччы Иван Юрьевич Винокуров эҕэрдэ тылын, үтүө санаа үтүмэнин тыыл бэтэрээннэригэр, сэрии сылын оҕолоругар, сэриигэ охтубут буойуннарга, байыаннай дьайыы кыттыылаахтарыгар анаата, улуус дьаһалтатын аатыттан махтал суруктары, наҕараадалары аҕам саастаах дьоммутугар туттарда. Бэтэрээннэр Сэбиэттэрин салайар Павлина Дмитриевна Кырбасова истиҥ эҕэрдэтин тириэртэ, улуус дьаһалтатыттан махтал суруктары нэһилиэк көхтөөх дьонугар анаата. Оҕо-ыччат эҕэрдэ ырыаларын ыллаатылар, «Дайыы» үҥкүү бөлөҕө байыаннай үҥкүүнэн киэргэттэ. Сэрии тулаайаҕа, сэрии сылын оҕото, СӨ Учууталлар учууталлара, педагогическай үлэ бэтэрээнэ Евдокия Гаврильевна Николаева сэрии тыынын, аччык-сут дьыллары, олоҕун ыарахан кэмин туһунан ахтан-санаан ааста. Педагогическай үлэ бэтэрээнэ Татьяна Иосифовна Николаева Аҕа дойду Улуу сэриитин кыттыылааҕа, суруйааччы, СӨ култууратын туйгуна, үгүс элбэх байыаннай наҕараадалаах Петров Илья Данилович — Мастаах Уола олоҕун кэрчик кэмнэрин, сэриигэ сылдьыбыт түгэннэрин арылхайдык кэпсээтэ.
Аҕа дойду сэриитигэр кыттыбыт, Улуу Кыайыы туһугар олохторун биэрбит, дойдуларыгар төннөн Кыайыы өрөгөйүн билбит бэтэрээннэрбитин, сэрии ыарахан кэмигэр фроҥҥа күннэтэ түбүгүрбүт оҕолору, ыччаттары, эбэлэри, эһэлэри үйэ тухары өйдүү-саныы сылдьыахпыт, кэнчээри ыччакка кэпсиэхпит. Ким да умнуллубат, туох да умнуллубат.
Василиса Окоемова, Кыргыдай.