Сэтинньи 18 күнүгэр 1 Күүлэккэ Халбаакы нэһилиэгин эдэр ыччатын кытта көрсүһүү буолла. Слет 40-ча эдэр ыччаты түмтэ.
Сүрүн сыала — нэһилиэктэр эдэр ыччаттарын икки ардыларыгар биир сомоҕо санааны түмүү, спортивнай-массовай, культурнай, айар-тутар дьоҕуру сайыннарыы, уопут үллэстиитэ буолар.
Ыалдьыттарбытын уохтаах кымыһынан, арыылаах алаадьынан айах тутан көрүстүбүт. Күн бастакы аҥарыгар дэриэбинэбит киэн туттар Герой дьонун уонна Ийэ искибиэригэр сырытыннардыбыт. Иккис аҥарыгар хамаанданан арахсан көрдөөх оонньуулар буоллулар, ол кэннэ «төгүрүк остуол» тула олорон эдэр ыччат түмсэрин туһугар инники былааннары ылынныбыт.
Киэһэ икки нэһилиэк холбоон концерт көрдөрдүлэр, ол кэннэ доҕордоһуу киэһэтигэр элбэх оонньуу, үҥкүү-битии буолла.
Ити курдук Күүлэппит нэһилиэгэр биир олус сэргэх тэрээһин буолла. Эдэр ыччат биир сомоҕо буолалларын көрдөрөн, барытыгар саба түһэн көмөлөһөн, тэрээһин үрдүк таһымнаахтык ааста.
Екатерина Григорьева,
1 Күүлэт.