Бүлүү улууһугар олунньу 7 күнүттэн Саха Өрөспүүбүлүкэтин ситэрилээх былааһын уорганнарын 2023 сыллааҕы үлэтин отчуотун туруоруу саҕаланна.
Бүлүү улууһун дьонун-сэргэтин иннигэр ситэрилээх былаас ааспыт сыллааҕы үлэтин түмүктэрин түөрт оробуочай бөлөх үс күн устата билиһиннэриэхтээх, этиилэрин истиэхтээх, болҕомтоҕо ылыахтаах.
Бастакы күн тыа хаһаайыстыбатын миниистирэ Артем Александров, Тырааныспар уонна суол хаһаайыстыбатын министиэристибэтин суол сулууспатын салайааччытын солбуйааччы Андрей Иванов, СӨ Судаарыстыбаннай сакаасчыт сулууспата ГКУ «Мин Сахам сирэ XXI үйэҕэ» дириэксийэтин отделын начаалынньыга Алексей Петров састааптаах бөлөх Баппаҕаайы уонна Лөкөчөөн нэһилиэктэрин дьонун-сэргэтин кытта көрүстэ. Бүлүү улууһуттан отчуотуур мунньахтарга улуус баһылыга Сергей Винокуров, Ил Түмэн депутата, оройуоннааҕы киин балыыһа кылаабынай бырааһа Егор Григорьев уо.д.а. сылдьыстылар.
Баппаҕаайы уонна Лөкөчөөн нэһилиэктэригэр отчуоту тыа хаһаайыстыбатын миниистирэ Артем Александров туруорда. Баппаҕаайы нэһилиэгин кулуубугар тэриллибит мунньахха 70 тахса киһи сылдьан ситэриилээх былаас ааспыт сыллааҕы үлэтин болҕойон иһиттэ. Отчуоту иһиттэххэ, кырдьык, киһи сэргиирэ элбэх. Бары хайысхаҕа биллэр-көстөр элбэх үлэ ыытыллыбыт, киһини үөрдэр үтүө түмүктэр ситиһиллибиттэр.
Отчуокка Бүлүү куоратынан ааһар федеральнай суолга аспаал бүрүөһүн ууруллубута, куорат кытылын оҥоруу бырайыага биир бастыҥ буолбута, Кыргыдайга эдэр исписэлиистэргэ толору хааччыллыылаах дьиэ тутуллубута, Дьөккөҥҥө диэри гаас ситимэ тардыллыбыта ахтылынна.
Баппаҕаайылар 2023 сылга элбэх үлэ ыытыллыбытын бэлиэтээн туран, сир анныттан ылыллар ууну ыраастыыр ыстаансыйа тутуутун, сири оҥорууну, мэччирэҥ сирин таһаарыыны, өртөөһүнү ыытыыны, федеральнай суолга тахсар быһылаан, алдьаныы элбэҕинэн быыһыыр сулууспа дьиэтин тутууну туруорустулар. Итини сэргэ, ССРС норуодунай учуутала М.А.Алексеев искибиэрин тутууга, кини аатынан оскуола дьиэтин ис дизайнын оҥорууга көмөнү эрэйдилэр. Интернет, суотабай сибээс хаачыстыбатын тупсарыыга, хочуолунай эргэрбит хочуолларын уларытыыны уо.д.а. боппуруостарга кэпсэттилэр.
Миниистир Артем Александров бары ыйытыктарга толору хоруйдары биэрдэ, хайдах быһаарыллыахтарын сөбүн ыйда, туруорсуулары мунньах боротокуолугар киллэрэргэ сорудахтаата. Кини тыа хаһаайыстыбата салгыы сайдар суолларыгар, үүтү-эти оҥорууга, өртөөһүнү ыытыыга, бэтэрэбиитэл кэпэрээссийэтин сайыннарыыга санааларын мустубут дьон болҕойон иһиттилэр. Ити туһунан хаһыат аныгыскы нүөмэрдэригэр сиһилии суруллуо.
Оройуоннааҕы киин балыыһа кылаабынай бырааһа, Ил Түмэн депутата Егор Григорьев аны сайын модульнай балыыһа тутуллуохтааҕын туһунан этиитин олохтоохтор ытыс тыаһынан көрүстүлэр.
Түмүккэ миниистир Артем Александров, Бүлүү улууһун баһылыга Сергей Винокуров, социальнай көмүскэл управлениетын салайааччы Алина Каратаева биирдиилээн дьону кытта көрүстүлэр, санааларын иһиттилэр.
Лөкөчөөҥҥө
Лөкөчөөҥҥө отчуоттуур мунньахха эмиэ элбэх киһи кыттыыны ылбытын миниистир Артем Александров бэйэтинэн бэлиэтээтэ.
Лөкөчөөннөр федеральнай суол уҥуор сытар кыбаарталга киин ититиини тиэрдэри, дьон, оҕо аймах федеральнай суолу куттала суох туоруур усулуобуйаларын тэрийэри, 100 оҕо үөрэнэр оскуолатын дьиэтэ эргэрбитинэн саҥа оскуола тутуутун, Интернети, суотабай сибээһи тупсарарары, мелиорация үлэтин ыытары уо.д.а. боппуруостары туруорустулар, иһэр уу боппуруоһа быһаарылларыгар кэпсэттилэр, эмп-том суоҕун ыйдылар.
Бүлүү улууһугар биир ситиһиилээх үлэлээх бааһынай хаһаайыстыбаны тэрийбит Афанасий Харлампьев оттуур ходуһатын уутун түһэриигэ, Саха сиригэр гаас кыайан тиийбэт сирдэригэр газгольдердары – гаас харайар емкостары туруоруу саҕаланан эрэрин, убатыллыбыт гааһы тиэрдиигэ судаарыстыбаннай бырагыраама ылылларыгар кэпсэттэ.
Миниистир Артем Александров, улуус баһылыга Сергей Винокуров бары ыйытыктарга, туруорсууларга толору быһаарыылары биэрдилэр. Миниистир этиилэри боротокуолга киллэрэргэ сорудахтаата.
Оройуоннааҕы балыыһа кылаабынай бырааһа, Ил Түмэн депутата Егор Григорьев эминэн хааччыйыы боппуруоһа быһаарыллыбытын, аныгыскы нэдиэлэттэн Бүлүү куоратын 5 №-дээх аптекатыттан эмп-том кэлиэҕин иһитиннэрдэ.
Биирдиилээн дьону кытта көрсүһүүгэ миниистир Артем Александров бааһынай хаһаайыстыбалаах Афанасий Харлампьевы кытта көрсөн санаатын иһиттэ.
Ити курдук, Баппаҕаайыга уонна Лөкөчөөҥҥө сэргэх, элбэх кэпсэтиилээх көрсүһүүлэр аастылар.
Николай Куприянов.