Сэтинньи 24-26 күннэригэр Арыылаах нэһилиэгэр элбэх спорт көрүҥэр уһулуччу дэгиттэр спортсмен Иван Евсеев бирииһигэр мас тардыһыытыгар өрөспүүбүлүкэтээҕи аһаҕас турнир ыытыллыа.
Хампаҕа тэриллэр улахан күрэхтэһиигэ элбэх кыттааччы, биллэр-көстөр чемпионнар кэлэллэрэ күүтүллэр. Аһаҕас турнирга эр дьоннор, дьахталлар, бэтэрээннэр чемпион үрдүк аатын былдьаһыахтара.
Саха сирин биир уһулуччу дэгиттэр спортсменын Иван Евсеев саха спордун икки национальнай көрүҥнэригэр – хапсаҕайга уонна мас тардыһыытыгар спорт маастара. Иван Евсеев Саха сирин мас тардыһыытыгар бастакы чемпионатын муҥутуур кыайыылааҕа буолар, 1992 сыллаахха ыытыллыбыт Саха сирин IV Тыа сирин спортивнай оонньууларын мас тардыһыытыгар чемпионун үрдүк аатын ылбыта. Хапсаҕайдаһан тустууга өрөспүүбүлүкэ 4 төгүллээх чемпиона буолар.
Иван Евсеев бэйэтин кэмигэр боксаҕа өрөспүүбүлүкэ биир күүстээх боксера этэ, боксаҕа уонна кикбоксиҥҥа Саха сирин 7 төгүллээх чемпионун аатын ылары ситиспитэ, боксаҕа спорт маастарыгар хандьытаат элбэх биллиилээх боксердары иитэн таһаарбыта. Иван Евсеевкэ бокса сайдыытыгар үтүөлэрин иһин, Арассыыйа таһымыгар биллэр спортсменнары иитэн таһаарбытыгар СӨ боксаҕа үтүөлээх тириэньэрин аата иҥэриллибитэ.
Кини итини сэргэ кикбоксиҥҥа, көҥүл тустууга спорт маастарыгар хандьытаат. Спортиҥҥа эмиэ биллэр-көстөр ситиһиилэрдээх, Арассыыйа 2011 сыллааҕы чемпионатын кыттыылааҕынан буолар.
Иван Евсеев Арыылаах нэһилиэгин баһылыгынан хас да болдьоххо талыллан үлэлээбитэ. Кини үлэлиир кэмигэр 2010 сыллаахха Хампа орто оскуолатын таас дьиэтэ, 2013 сыллаахха арочнай спорт саалата, 2014 сыллаахха саха балаҕана үлэҕэ киирбиттэрэ, сайыҥҥы уу ситимэ тардыллыбыта, ыһыахтыыр сир оҥоһуллубута, Кыайыы болуоссата уларытан тутуллубута, бөһүөлэк уулуссалара өрөмүөннэммиттэрэ, уот тардыллыбыта, Сэбиэскэй Сойуус Геройдара Геройдар Н.А.Кондаковка уонна Н.С.Степановка аналлаах пааматынньык-бүүстэр туруоруллубуттара, суотабай сибээс киирбитэ, «Хаарбах дьиэлэртэн көһөрүү» бырагырааманан 12 квартиралаах толору хааччыллыылаах дьиэ үлэҕэ киирбитэ уо.д.а. оҥоһуллубута, тутуллубута.
Үлэтигэр, спорка элбэх үтүөлэрдээх Иван Евсеев Бүлүү улууһун, Бүлүү куоратын, Арыылаах нэһилиэгин Бочуоттаах олохтооҕо буолар.
Сэтинньи 24-26 күннэригэр тэриллэр Иван Евсеев бириистэригэр мас тардыһыыга өрөспүүбүлүкэтээҕи аһаҕас турнирга Саха сирин күүстээх мадьынылара көрсүөхтэрэ, ким кыахтааҕын быһаарсыахтара.
Николай Куприянов.