Биһиги «Мин бизнеһим: Бүлүү –инвестиция территорията» таһымнаах форум саҕаланыыта Саха сирин саамай биллиилээх, мөлүйүөнүнэн ааҕааччылаах блогерын Вячеслав Романовы — Panda Sakha көрүстүбүт. Кини күн иккис аҥарыгар блогердарга аналлаах былаһаакка үлэтигэр кыттыахтаах, блогтары ыытыы туһунан кэпсиэхтээх.
Сэмэй киһи Panda Sakha улахан тэрээһиннэргэ кыттыбат идэлээх. Бүлүүгэ форумҥа саҥа саҕалааччылары үөрэтэргэ ыҥырбыттарын быһа гыммакка кэлбитин, кини киһи быһыытынан хайдаҕын көрдөрөр диэххэ сөп. Кини билигин сахалартан сааамай элбэх сурутааччылаах блогер буолар.
—Вячеслав, Бүлүүгэ диэри Мэҥэ-Хаҥалас Нуораҕанытыттан хайдах айаннаан кэллиҥ?
— Бэҕэһээ Дьокуускайтан кыра массыынанна эбиэттэн киэһэ хоҥнубутум. Өлүөнэни сарсыарда эрдэ туораабытым, хонон баран эһиги диэки айаннаабытым. Суол оччото суох диэххэ, Бүлүүгэ кэлиэхпэр диэри үстэ сынньанан утуйанкэллим. Сири-дойдуну көрөн кэллим, бу эргин сылдьа иликпин. Түүн 3 чаас ааһыыта Бүлүүнү булбутум.
— Форумҥа блогердары үөрэтэ, сүбэ-ама биэрэ кэллиҥ?
— Блогу ыытыы туһунан эттэххэ, барыта кыраттан саҕаланар эбит. Тута сылдьар төлөпүөҥҥүнэн ханна баҕарар тахсыахха сөп. Аныгы компьютер, бүтэһик оҥоһуу төлөпүөн наадата суох. Билигин барыта аһаҕас, барыта бэйэҥ кыаҕыҥ иһинэн, бэйэҕиттэн тутулуктаах.
Форум сиэксийэтигэр бэйэм туспунан, хайдах подписка хомуйары, блогу сайыннарары, видео устуу туһунан кэпсиэм. Урут маннык тэрээһиннэргэ кытта илик этим.
— Төһө элбэх сурутааччылааххыный?
— Араас социальнай ситимнэргэ быһа холоон 13 мөл. тахса сурутааччы баар. Мин блогум саҥата суох, онон тылбааска наада суох буолан тахсар. Саха сирин туһунан блогпун араас омук барыта көрөр.
— Вячеслав, форумҥа ситиһиилэри!
Николай Куприянов.