«Мин бизнеһим: Бүлүү –инвестиция территорията» форумҥа тыа хаһаайыстыбатын боппуруостарын сайдыытын «Тыа хаһаайыстыбатын сайыннарыы — аһынан-үөлүнэн хааччыйыыны быһаарыы»былаһааккаҕа дьүүлэстилэр.
Былаһаакка үлэтин тыа хаһаайыстыбатын миниистирин бастакы солбуйааччы Анна Стручкова модератор быһыытынан салайан ыытта. Бастатан, Бүлүү улууһун тыатын хаһаайыстыбатын департаменын салайааччы Павел Иннокентьев улууска тыа хаһаайыстыбатын салаатын бүгүҥҥү күҥҥэ туругун билиһиннэрдэ. Биһиги улууспут тыа хаһаайыстыбатын көрдөрүүлэринэн өрөспүүбүлүкэҕэ инники күөҥҥэ сылдьара бэлиэтэннэ.
Анна Стручкова тыа хаһаайыстыбатын министиэристибэтин бүгүҥҥү күннээҕи үлэтин, былааннарын билиһиннэрдэ. Өрөспүүбүлүкэтээҕи «Мин биисиньэһим» киин отделын салайааччы Владимир Прокопьев киин тыа хаһаайыстабытынан дьарыктанар урбаанньыттарга, бааһынай хаһаайыстыбалаахтарга оҥорор элбэх өҥөтүн сиһилии кэпсээтэ.
Үөһээ Бүлүү уонна Сунтаар улуустарын тыаларынхаһаайыстыбатын управлениеларын салайааччылараКирилл Гаврильев уонна Владимир Афанасьев сириоҥорууга, мелиорация боппуруостарыгар кэпсэттилэр. Кыһыл Сыыртан урбаанньыт Елена Пирожникова улахан тэпилиисэ туттарга, Лөкөчөөнтөн бааһынай хаһаайыстыбалааах Афанасий Харлампьев 120 төбөҕө аналлаах хотонун ситэрэригэр, оборудование атыылаһарыгар көмө көрдөөтүлэр.
Ньурбаттан агроном Егор Филиппов элбэх сыллаах оту ыһарга сиэмэ атыылаһыытыгар субсидия туруоруста.
Үтүөлээх мелиоратор Анатолий Петров Бүлүү улууһугар мелиорация боппуруостарынан күүскэ дьарыктанарга үбүлээһин көрүллэрин туруоруста.
Былаһаакка кыттыылаахтара тыа сирин дьонугар ипотека ылалларыгар көмө наадатын ыйдылар, өрөспүүбүлүкэ таһымыгар Тыа сирин кэлимник сайыннарыы бырагыраама үлэлииригэр баҕа санааларын биллэрдилэр.
Анна Стручкова көмө туруорсар боппуруостарыболҕомтоҕо ылбыттарын, мелиорация боппуруоһугар үлэ бара турарын, ипотекаҕа эдэр испэсэлиистэргэ көмө быһыытынан боппуруоһу үөрэтэ сылдьалларын билиһиннэрдэ, араас бырагыраамалары хоннохтоохтук үлэлэтиигэ федеральнай киини кытта ыкса сибээстэһэр былааннаахтарын иһитиннэрдэ.
Түмүккэ былаһаакка модератора, тыа хаһаайыстыбатын миниистирин бастакы солбуйааччы Анна Стручковабылаһааккаҕа сөптөөх боппуруостар туруоруллан көрүллүбүттэрин, тыа хаһаайыстыбатын министиэристибэтэ мелиорациянан дьарыктаныыга, сири оҥорууга, элбэх сыллаах оту үүннэриигэ, субсидия көрүҥнэрин элбэтиигэ, түмүгэр, ынах сүөһү ахсаанын энчирэппэт туһугар, төттөрүтүн элбэтэргэ, хаачыстыбалаах элбэх үүтү ыырга, эти оҥорорго үлэ ыытарын иһитиннэрдэ.
Анна Стручкова үөрүүлээх быһыыга тыа хаһаайыстыбатын департаменын салайааччытыгар Павел Иннокентьевка министиэристибэ Махтал суругун туттарда.
Күн иккис аҥарыгар былаһаакка кыттыылаахтара «Сыа Бүлүү» кэпэрэтипкэ, «Туйгун-Ас» кэпэрэтиип маҕаһыыныгар, Чочуга «Ампаардаах» хаһаайыстыбаҕа,Кыадаҥдаҕа көтөр иитэр «Кынат» сыаҕар сылдьан үлэни билистилэр.
Николай Куприянов.