«Утум ситимэ» түмсүү далбардара Чочу нэһилиэгэр биир бастыҥ түмсүүнэн ааҕыллан, сыл түмүгэр кыһыл дорожканан хааман, дьаһалтабыт грамотатынан, бэлэҕинэн наҕараадаламмыппыт.
Анал байыаннай дьайыыга көмө үлэтин кэнниттэн аны саха таҥаһын тигиитигэр ылсан үлэлээн, үбүлүөйдээх ыһыахха үлэбитин бүтэрбиппит. Тикпит таҥастарбытын кулуупка бэлэхтээбиппит.
Сатабыллаах, уус тарбахтаах иистэнньэҥнэр салайааччыбыт Петрова Зинаида Егоровна, Варфоломеева Розалия Васильевна кулууптар бэйэлэрэ бас билэр таҥастаахтара ордук буолуо этэ диэн этии киллэрбиттэрин түмсүү чилиэннэрэ сөбүлэспиттэрэ. Сөптөөх таҥастары ылан аҕалбыттарын кулууп үлэһиттэрэ Трофимова Степанида Владимировна, Руфова Евдокия Михайловна, Степанова Гелена Александровна иистэнэр түмсүү чилиэннэрин Николаева Марфа Прокопьевна, Николаева Анастасия Константиновна, Окоемова Анна Николаевна кытары сүбэлэһэн, быһан, ким тугу сатыырынан үллэстэн тикпиттэрэ. Кулууптар ылан биэрбит матырыйааллара тиийбэтэҕэр “Үрүҥ көмүс волонтер” сертификаппытынан саһыл тириитэ, оҕуруо ылан туттубуппут.
Кыргыттар өрөбүлү, бырааһынньыктары, дьиэтээҕи кыһалҕаларын, түбүктэрин быраҕан туран, былааннарын толордулар, бэлэхтэрин оҥордулар, биир санаалаахтарын, түмсүүлээхтэрин көрдөрдүлэр.
Чочубут нэһилиэгэ быйылгы үбүлүөйдээх ыһыах тэрээһиннэригэр кыттан уопсай түмүгүнэн иккис миэстэ буолбута. Бу кыайыыга “Утум ситимэ” түмсүү кыттыгаһа баарыттан биһиги, түмсүү чилиэннэрэ, олус үөрдүбүт, астынныбыт. Инники өттүгэр былааннаах үлэбитигэр тирэх буолуоҕа.
Түгэнинэн туһанан, “Утум ситимэ” түмсүү аатыттан ыһыах торумугар актыыбынайдык кыттыбыт кыайыылаах дьоннорбутун итиититик-истиҥник эҕэрдэлиибит, инники өттүгэр үрдүктэн үрдүк ситиһиилэри баҕарабыт.
Федора Николаева,
Чочу нэһилиэгэ.
Фото: Рудова Евдокия.