Бэҕэһээҥҥи курдук Үрдүк Айыыларга уонна Айыы Тойон Таҥараҕа көрдөспүт күммүт суоҕа, хата Аар Айыыларбыт истэннэр, өбүгэлэрбит көмөлөһөннөр үс саастаах кырачаан Алмааспыт көһүннэ.
Бастакы күн нэһилиэкпит олохтоохторо туруммут буоллахпытына, иккис күн нэһилиэк дьаһалтатыгар тэриллибит штабка регистрация ааспытынан көрдөххө, 207 киһи оҕо көрдөөһүнүгэр кытынна. Ыаллыы сытар нэһилиэкпититтэн — Хампаттан хас да түһүмэҕинэн элбэх киһи, дьахталлар кытта, Степан Григорьевтаах хамаанда тэринэн кэллилэр, Илбэҥэ нэһилиэгиттэн коптердаах уолаттар, баһылыктара Егор Афанасьевич Николаевы кытта, Өкүндү нэһилиэгиттэн Чингиз Балданов, Чочу нэһилиэгиттэн баһылык Петр Александрович Догоюсов хамаанда тэринэн кэллилэр. Чинэкэттэн С.М.Васильев аатынан орто оскуола дириэктэрэ Александр Алексеевич Васильев учууталлары илдьэ туспа хамаанда буолан кэлэн, бастаан оҕо «Россия» диэн суруктаах киэпкэтин, онтон оҕо барахсаны бэйэтин булла. Сосновкаттан уонна Кыһыл Сыыртан эмиэ тус-туспа хамаандалар кэлэн оҕону көрдөөһүҥҥэ туруммуттара. Саамай элбэх хамаандалар Бүлүү куоратыттан кэлбиттэрэ. Ол курдук Н.Г. Чернышевскай аатынан Бүлүүтээҕи профессиональнай-педагогическай колледжтан 40-ча студены биир дойдулаахпыт Ньукулай Николаев салайан илдьэ сырытта. Кинилэр ортолоругар бэйэбит оҕобут Харысхан Дмитриев, саҥа аһыллыбыт медицинскэй отделение студеннара кытта бааллар. П.А.Петров аатынан Бүлүүтээҕи киин балыыһа коллектива, кылаабынай быраас, Ил Түмэн Бүлүүттэн депутата Егор Анатольевич Григорьев улахан хамаанданан кэлэн көрдөөһүҥҥэ элбэхтик үлэлээтэ. Бүлүүтээҕи социальнай харысхал управлениетын үлэһиттэрэ, С.М.Аржаков аатынан дьиэ кэргэҥҥэ иитиигэ көмөлөһөр Бүлүүтээҕи киин дириэктэрэ Е.А. Дашевскай уонна Бүлүү улууһун аҕаларын түмсүүлэрин салайааччыта Юрий Иванович Тутукаров көрдөөһүҥҥэ биир күүстээх хамаанда буолбуттара. «Сахатранснефтегаз» тэрилтэттэн эмиэ хас да киһи, Бүлүү куоратын олохтоохторо, үтүө санаалаах дьонноро күүс-көмө буоллулар. Биир улахан хамаанданы — «Авиалесоохрана» үлэһиттэрин бэйэбит оҕобут Айсен Корякин илдьэ сырытта. Үөрэх үлэһиттэрин управлениетыттан туспа хамаанданы Андрей Никифорович Тихонов салайан илдьэ сырытта. Итини таһынан, Үөһээ Бүлүү улууһуттан техническэй колледж үлэһиттэрэ, студеннара эмиэ туспа хамаанда буолан үлэлээтилэр. Бүлүүтээҕи Лесхоз үлэһиттэрэ эмиэ көрдөөһүҥҥэ сырыттылар. Үөһээ Бүлүүттэн МЧС үлэһиттэрэ кэлэннэр, эмиэ төһүү күүс буоллулар.
Бэйэбит нэһилиэкпититтэн элбэх киһи көрдөөһүҥҥэ сырытта. Ол курдук тус-туспа хамаандалары Степан Абрамов, Афанасий Никифоров, Степан Дмитриевич Гоголев, Дмитрий Гоголев салайан илдьэ сырыттылар. Дьэ, ити курдук элбэх киһи ыйыллыбыт маршруттарынан сэрэхтээх буолууга инструктаж ааһан, илии баттаан баран, бэйэ-бэйэлэриттэн 5 м сыаптаан, ыйыллыбыт сири тараахтаан көрдөөтүлэр. Икки сиргэ көрдөөччүлэргэ аһатыы пууннара тэрилиннилэр. Манна хара маҥнайгыттан миини, торуойу, бурдук аһын оскуола уонна оҕо садын повардара буһардылар. Уонна нэһилиэккэ хаста да ватсабынан ыҥырыы ыытаммыт, нэһилиэк дьахталлара ас бөҕөнү астаан, дьаһалта үлэһиттэрэ В. Г. Степанова, Т.Е. Гоголева, Т.В.Никонова, оскуола бухгалтердара Н.Н.Иванова, Н.С.Григорьева, учуутал Э.П.Данилова, оҕо садын үлэһиттэрэ К.А.Дмитриева, А.В.Егорова кэлбит дьону быыстала суох аһаттылар, иһиттэрин хомуйа тутан истилэр.
Манна өрөспүүбүлүкэбит араас муннугар олорор идэлээх дьоммутун-көрбүөччүлэри бэлиэтиэҕи баҕарыллар. Кинилэр бары кэриэтэ оҕо тыыннааҕын, дэриэбинэ тас өттүгэр сылдьарын ыйбыттара. Ол иһин кинилэр ыйбыт сирдэринэн локальнай көрдөөһүннэр тэриллибиттэрэ. Туох баар нэһилиэк иһигэр уонна таһыгар баар тутуулар бары хастыыта да көрүллүбүттэрэ. Итини таһынан, прокуратура, следственнэй комитет уонна полиция үлэһиттэрэ хара маҥнайгыттан үлэлэһэннэр, сөптөөх сүбэлэри биэрэннэр, штабка Иван Степанович Капитонов карта онорон, сылдьыбыт уонна көрүллүбүт сирдэри квадраттарынан бэлиэтээммит, сөптөөх хардыылары оҥордубут. Суут-сокуон үлэһиттэрин көмөлөрө, сүбэлэрэ манна улахан оруоллаах.
Онон «Норуот күүһэ -көмүөл күүһэ» дииллэрэ манна көһүннэ, кырачаан 3 саастаах Алмааспыт хата этэҥҥэ көһүннэ.
Суругум түмүгэр этиэм этэ: 1. Төрөппүттэр оҕолоргутун КӨРӨ сылдьаргытыгар.
2. Оройуон уонна олохтоох дьаһалталарга көрдөөһүҥҥэ сөптөөх тепловизордар, квадрокоптердар уонна фонариктарынан хааччынарга, харчы көрөргө. Туох баҕар, хаһан баҕар наада буолуон сөп эбит.
3. Көрдөөһүҥҥэ сылдьыбыт, сүбэ биэрбит дьоҥҥо барыгытыгар штаб аатыттан барҕа МАХТАЛБЫН тириэрдэбин. Барыта этэҥҥэ эрэ буоллун!
Дьөккөнтөн Альбина Ионовна Ионова.