Н.И.Протопова аатынан «Кэскил» оҕо киинин дьиэтигэр балаҕан ыйын 8, 9 уонна 10 күннэригэр үлэлиир Бүлүү куорат «Октябрьскай» 140 учаастактааҕы быыбардыыр хамыыһайата балаҕан ыйын 8 күнүгэр сарсыарда 8 чаастан үлэтин саҕалаата.
Хамыыһыйа чилиэннэрэ быыбардыыр учаастакка эрдэ кэлэн докумуоннары, бүлүтүөннэри остуолларга уурталаан, бэрийэн быыбардааччылары толору бэлэмнээх көрсөллөр. 8 чааска 140 УИК бэрэссэдээтэлэ Клавдия Иванова мустубут дьону — быыбардааччылары, хамыыһыйа чилиэннэрин, быыбардар хаамыыларын Уопсастыбаннай палататтан, баартыйалартан кэтээн көрөөччүлэри быыбардар саҕаламмыттарынан эҕэрдэлээтэ.
— Биһиги учаастакка испииһэгинэн 424 быыбардааччылаахпыт. Үс күннээх быыбардар саҕаламмыттарынан бары учаастактааҕы быыбардыыр хамыыһыйаларга ситиһиилээх үлэни, быыбардааччылар учаастактарга көхтөөхтүк кэлэн куоластыылларыгар баҕарыам этэ, — диэтэ Клавдия Иванова.
140 УИК-ка бастакы быыбардааччытынан Саргылана Михайлова буолла. Кини бүлүтүөннэри бастакынан ылан, толорон, уурунаҕа түһэрдэ.
Балаҕан ыйын 8 күнүгэр Бүлүү улууһун 34 быыбардыыр хамыыһыйалара сарсыарда 8 чаастан үс күннээх үлэлэрин саҕалаатылар.
Николай Куприянов.