Бүгүн оройуоннааҕы библиотекаҕа “Олоҕум аргыһа – “Олох суола” диэн хаһыат эрэдээксийэтэ ааҕааччыларын кытта истиҥ көрсүһүүтэ буолан ааста.
Көрсүһүү Бүлүү библиотекатын төрүттэммитэ 125 сылын чэрчитинэн ыытылынна. Хаһыат уонна библиотека бэйэ-бэйэлэрин кытта дьүөрэлэһэр сыаллаах-соруктаах, дириҥ ситимнээх, дьон-сэргэ билиитин-көрүүтүн хаҥатар, төрөөбүт улууспут сайдыытын туһугар ситимнээх үлэни ыытар тэрилтэлэр. Ол сиэринэн уһун сыллар устата сибээстэрин быспакка, мэлдьи хардарыта көмөлөсүһэн, өйөһөн, биир санаанан үлэлээн кэллилэр. Ол туһунан бу көрсүһүүнү көҕүлээбит, иилээн-саҕалаан ыыппыт киин библиотека кыраайы үөрэтиигэ кылаабынай библиотекара Луиза Кононова уонна хаһыат кылаабынай эрэдээктэрэ Изольда Загитова тоһоҕолоон бэлиэтээтилэр.
Көрсүһүү кэмигэр хаһыат бэриниилээх ааҕааччылара эрэдээксийэ үлэһиттэрин кытта атах тэпсэн олорон сэһэргэстилэр, библиотека архыыбыттан араас кэмҥэ тахсыбыт хаһыаттары сэгэтэн сэргээн көрдүлэр, эрэдээксийэни кытта үлэлэспит кэмнэрин ахтан-санаан аастылар, хаһыат үлэтигэр, ис хоһоонугар бэйэлэрин көрүүлэрин үллэһиннилэр, баҕа санааларын эттилэр. Санаан да көрдөххө, хаһыат кэлэктиибэ ааҕааччылары кытта бу маннык быһаччы сибээстэһэрэ, кэпсэтэрэ, дьон санаатын билэрэрэ олус туһалаах. Айар-тутар дьоҥҥо ордук чугас, тиийимтиэ, наадалаах, туһалаах хаһыаты таһаарыан сөп. Нууччалыы эттэххэ, “обратная связь” диэн. Онон маннык көрсүһүүлэри биирдэ эрэ буолбакка, кэмиттэн кэмигэр ыытар наадалааҕын бары да сөбүлэстилэр. Кылаабынай эрэдээктэр хаһыат үлэтин, сонун саҕалааһыннарын, инники былааннарын, сурутуу боппуруостарын көтөхтө.
Маны сэргэ эрэдээксийэ хаһыат эрэ туһунан буолбакка улуус, куорат проблемнай, сытыы, чопчу тиэмэлэри көтөҕөр, дьүүллэһии тэрийэр, дьон өйүн-санаатын бу боппуруос быһаарыытыгар түмэр кыахтааҕа өйдөнөр. Ол курдук бу көрсүһүүгэ кылаабынай эрэдээктэр бу сайын Мира уулуссаҕа турар эргэ дьиэ, 1913 с. тутуллубут уруккута Новониколаевскай таҥаратын дьиэтэ умайан хаалан инники дьылҕата хайдах буолуохтааҕа биллибэтин туһунан боппуруос көтөхтө. Биир өттүттэн сэбиэскэй кэмҥэ таҥара дьиэтин уопсай тутулугар элбэх уларытыы-тэлэритии буолбутунан, баһаар кэнниттэн улаханнык эмсэҕэлээбитинэн чөлүгэр түһэрии олус ыарахан суумалаах буолуон сөбүнэн, эргэ дьиэни чөлүгэр түһэрэ сатааһын сөптөөх быһаарыы буолуо дуо диэн саарбахтааһын баар. Ол гынан баран биһиги, бүлүүлэр, кырдьаҕас куораппыт баай историялаах былыргы дьиэлэрин сүтэрбэккэ, харыстаан, кэлэр көлүөнэлэргэ хайаан да тириэрдиэхтээхпит диэн бигэ санаа эмиэ баар. Ол иһин бу боппуруос аһаҕас, улуус, куорат дьаһалталара быһаччы кыттыыларынан эрэ быһаарыллар кыахтаах. Бу боппуруос дьүүллэһиитигэр историктар, кыраайы үөрэтээччилэр Иванов Сергей Васильевич, Афанасьева Татьяна Николаевна, библиотека бэтэрээнэ Дмитриева Матрена Петровна көхтөөх кыттыыны ыллылар.
Көрсүһүү кэмигэр хаһыат туһунан викторина ыытылынна. Таайбараҥ муҥутуур кыайыылааҕынан П.Х.Староватов аатынан кыраайы үөрэтэр музей дириэктэрэ Татьяна Николаевна Афанасьева буолла. Киниэхэ хаһыакка сыллааҕы сурутуу сертификата үөрүүлээх быһыыга-майгыга туттарылынна. Иккис, үһүс миэстэлэри Евсеева Августина Платоновна уонна Алексеева Мария Андреевна ыллылар, кинилэргэ эмиэ сэмэй бириистэр туттарылыннылар.
Бу курдук олус интэриэһинэй, сэргэх, туһалаах көрсүһүү буолан ааста. Эрэдээксийэ аатыттан Бүлүүтээҕи киин библиотека кэллэктиибигэр, чуолаан Луиза Яковлевна Кононоваҕа барҕа махталбытын тиэрдэбит, инникитин да маннык үлэлэһэ, сибээстэһэ туруохпут диэн баҕа санаабытын этэбит.
Изольда Загитова.