Биһиги өрөспүүбүлүкэбитигэр талааннаах, идэтигэр бэриниилээх, үтүө суобастаах учууталлар элбэхтэр. Ол курдук Бүлүүтээҕи Г.И.Чиряев аатынан орто оскуолаҕа саха тылын уонна литературатын учууталынан, Бүлүү куоратын бочуоттаах олохтооҕо, биһиги оскуолабытыгар 48 сыл тохтоло суох үлэлээн, элбэх выпускнигы үөрэтэн таһаарбыт, Российскай Федерация үөрэҕириитин туйгуна, Саха Өрөспүүбүлүкэтин үтүөлээх учуутала, «Ыллык» түмсүү чилиэнэ, ытыктыыр бэтэрээн учууталбыт Павлина Даниловна Иванова бэс ыйын 25 күнүгэр 85 сааһын туолла.
Мин Павлина Даниловналыын Г. И. Чиряев аатынан оскуолаҕа 2011 сыллаахха үлэлии кэлиэхпиттэн алтыһабын. 2020 сылтан кылааһым оҕолорун кытта ыкса шефтэһэн үлэлиибит. Кини бэтэрээн учууталбыт, наставникпыт, бастыҥ сүбэһиппит буолар. Төрөппүттэр, оҕолор куруук дьиэтигэр сылдьан кэпсэтэбит-сэлэһэбит, кыра көмө оҥоробут. Павлина Даниловна үөрэнээччилэргэ да, биһиэхэ да холобур буолар киһи. Куруук үтүө тыллары анаан алҕаан ыытар. Саха Далбар Хотунун, түгэнинэн туһанан, бу самаан сайын кэлбитинэн, Үрүҥ тунах ыһыахтарынан уонна 85 сааһынан эҕэрдэлиибит, доруобуйаны, дьиэ кэргэнигэр дьолу, этэҥҥэ буолууну баҕарабыт!
Билии киэҥ аартыгар сирдээбит учууталбытынан киэн туттабыт.
Анна Яковлева,
Г.И. Чиряев аатынан 1 №-дээх оскуола эбии үөрэхтээһиҥҥэ учуутала.