Сэтинньи 27 күнүгэр тэриллибит оройуон Сэбиэтин 9 сессиятыгар 19 депутат бэбиэскэҕэ киирбит 8 боппуруоһу көрөн бигэргэттилэр.
Сессия сүрүн боппуруоһун — «Бүлүү улууһа (оройуона)» муниципальнай оройуон 2025 сылга уонна кэлэр 2026-27 сылларга бүддьүөтүн туһунан» иһитинэриини үп-экономика управлениетын салайааччы Анисим Алексеев оҥордо.
Кэлэр сыллааҕы бүддьүөт сыыппараларын билиһиннэрдэххэ, дохуот 4,586 мөл. солк тэҥнэһэр, итинтэн өрөспүүбүлүкэ бүддьүөтүттэн 4,267 мөл. солк үп трансферт быһыытынан аһардыллыахтаах. Нолуоктан уонна нолуога суох дохуот киириитэ 319 мөл. солк. быһыллыбыт.
Оройуон Сэбиэтин депутаттара улуус кэлэр сылга бүддьүөтүн дохуоттаах чааһын, муниципальнай бырагыраамалар параметрдарын бастакы ааҕыыга бигэргэттилэр.
Депутаттар улуус Устаабыгар, оройуон Сэбиэтин быһаарыытыгар уларытыылары киллэриини бигэргэттилэр, үп-экономика управлениетын салайааччытын солбуйааччы Галина Спиридонованы «Саха өрөспүүбүлүкэтин муниципальнай сулууспатын туйгуна» бэлиэнэн наҕараадалыырга сөбүлэҥнэрин биэрдилэр.
Депутаттар кистэлэҥ куоластааһынынан өр сылларга II Күүлэт нэһилиэгин баһылыгынан үлэлээбит Андрей Ивановка, эмиэ өр кэмҥэ Бүлүү авиапордугар көтүүлэри хааччыйар аэронавигационнай сулууспаны салайан үлэлэппит, оройуон Сэбиэтигэр депутатынан талыллан үлэлээбит Виктор Платоновка «Бүлүү улууһун Бочуоттаах олохтооҕо» ааттары иҥэрэргэ быһаардылар.
Оройуон Сэбиэтин бэрэссэдээтэлэ Гаврил Корякин Госдумаҕа тэриллибит көрсүһүүгэ уокуруктары тэрийиигэ сыһыаннаах аһаҕас былаас туһунан федеральнай сокуон олоххо киириитин тула кэпсэтиини, сокуон киириэхтээх болдьохторун билиһиннэрдэ.
Сессияҕа Бүлүү оройуонун борокуруора Антон Масин кыттыыны ылла.
Николай Куприянов.