25 депутаттаах оройуон Сэбиэтин уочараттаах иккис сессиятыгар улуус 2024 сыллааҕы уонна салгыы кэлэр икки сылга бүддьүөтүн, улуус Устаабыгар уларытыылары киллэрии, оройуон Сэбиэтин депутатын боломуочуйаларын тохтотуу боппуруостара көрүлүннэ.
Сэтинньи 23 күнүгэр тэриллибит оройуон Сэбиэтин II сессиятын үлэтигэр 18 депутат кыттыыны ылла. Сессияҕа депутаттар көрүүлэригэр киллэриллибит боппуруостартан үксүлэрэ улуус Устаабыгар, муниципальнай сулууспалаахтар хамнастарын төлөбүрүн бэрээдэгэр уларытыылары киллэриини кытта ситимнээх буоллулар.
«Бүлүү улууһун 2024 сылга уонна былааннаах 2025-2026 сылларга бүддьүөтүн туһунан» сессия сүрүн боппуруоһун депутаттар билсиилэригэр уонна бигэргэтиилэригэр улуус дьаһалтатын үпкэ-экономикаҕа управлениетын салайааччы Анисим Алексеев киллэрдэ. Депутаттар бастакы ааҕыыга бүддьүөт дохуоттаах чааһын сүрүн сыыппараларын кытта билистилэр. Ол курдук, кэлэр сылга улуус бүддьүөтүн дохуота 4,1 млрд. солк. суумаҕа тэҥнэһэрэ, итинтэн өрөспүүбүлүкэ бүддьүөтүттэн аһардыллар трансферт үбэ 3,7 млрд. солк. буолара, улууска 391 мөл. солк. суумалаах нолуоктан уонна нолуога суох дохуот киирэрэ этилиннэ.
Дьүүллэһиигэ кыттыбыт депутаттар кэккэ этиилэри киллэрдилэр. Мастаах уокуругуттан депутат Сергей Львов Кыргыдайга сибээһи тупсарыыны боротокуолга киллэрэргэ, депутат Прокопий Захаров кыра уонна орто урбаан сайдарыгар арыый элбэх үп көрүллэригэр этиннилэр.
Депутаттар бүддьүөт дохуоттаах чааһын бастакы ааҕыыга бигэргэттилэр.
Сессияҕа «Новые люди» баартыйаттан күһүн оройуон Сэбиэтин депутатынан талыллыбыт Александр Ермолаев Саха Өрөспүүбүлүкэтин Киин быыбардыыр хамыыһыйатыгар үлэҕэ көһөрүнэн сибээстээн депутатын боломуочуйатын тохтотуу көрүлүннэ уонна бигэргэтилиннэ.
Түмүккэ, депутаттар муниципальнай сулууспаҕа өр сылларга эҥкилэ суох үлэлиир Аксинья Кудайбердиеваҕа «Муниципальнай сулууспа туйгуна» бэлиэни биэрэргэ биир санаанан куоластаатылар.
Даҕатан эттэххэ, 25 депутаттаах V ыҥырыылаах оройуон Сэбиэтигэр 15 депутат баартыйалар испииһэктэринэн, 10 депутат биир мандаттаах уокуруктартан быыбардаммыттара. Күһүҥҥү быыбар түмүгүнэн, «Биир ньыгыл Арассыыйа» баартыйа оройуон Сэбиэтигэр -18, «Новые люди» — 2, КПРФ -2, «Сиэрдээх Арассыыйа- Кырдьык иһин» баартыйа 1 депутаттаммыттара.
Биир мандаттаах уокуруктартан оройуон Сэбиэтигэр талыллыбыт депутаттары билиһиннэрдэххэ, Бүлүү куорат 1 №-дээх «Хоту» уокуругуттан Марианна Спиридонова, 2 №-дээх «Соҕуруу» — Анна Егорова, 3 №-дээх «Илиҥҥи» — Матрена Гаврильева, 4 №-дээх «Арҕаа» — Иван Алексеев, 5 №-дээх «Кыһыл Сыыр» — Иван Кайкы, 6 №-дээх «Орто Бүлүү» —Георгий Осипов, 7 №-дээх «Бүлүү» — Егор Константинов, 8 №-дээх «Аржаков» — Прокопий Протопопов, 9 №-дээх «Күүлэт» — Александра Егорова, 10 №-дээх «Мастаах» уокуругуттан Сергей Львов депутаттарынан быыбардаммыттара.
Балаҕан ыйын 21 күнүгэр тэриллибит оройуон Сэбиэтин бастакы сессиятын үлэтигэр кыттыбыт 21 депутат кистэлэҥ куоластааһыҥҥа оройуон Сэбиэтин бэрэссэдээтэлинэн Гаврил Корякины биир санаанан талбыттара.
Ахсынньы ый бүтүүтэ ыытыллыахтаах оройуон Сэбиэтин уочараттаах сессиятыгар депутаттар иккис ааҕыыга улуус кэлэр сылга бүддьүөтүн бигэргэтиэхтэрэ.
Николай Куприянов.
