Бүгүн, ахсынньы 19 күнүгэр, Саха Өрөспүүбүлүкэтин Ил Дархана Айсен Николаев Саха Өрөспүүбүлүкэтин Судаарыстыбаннай Мунньаҕар – Ил Түмэҥҥэ сэттис төгүлүн Туһаайан этиитин оҥордо.
Кини Туһаайан этиитигэр ааһан эрэр сыл түмүктэрин, өрөспүүбүлүкэ кэлэр сылларга сайдыытын сүрүн соруктарын билиһиннэрдэ, байыаннай эпэрээссийэни, кини кыттыылаахтарын өйөөһүҥҥэ, Өлүөнэ эбэни туоруур муоста тутуутугар, суоллары оҥорууга, элбэх оҕолоох ыалларга көмөнү күүһүрдүүгэ, доруобуйа харыстабылын эйгэтигэр баар ситиһиилэргэ, кэлэр 2025 сылга Улуу Кыайыы 80 сылын таһымнаахтык бэлиэтииргэ уо.д.а.түгэннэргэ болҕомтону хатаата, кэлэр 2025 сылы – Ийэ дойдуну көмүскээччи сылынан биллэрдэ.
Ил Дархан Айсен Николаев Ил Түмэҥҥэ Туһаайан этиитигэр кэлэр сылга тыа хаһаайыстыбатын салаатыгар тахсыахтаах сүҥкэн уларыйыыны – улуустар тыа хаһаайыстыбатын боломуочуйаларын иһинэн тиэрдиллэр үбүлээһини ханнык хайысхаҕа тутталларын бэйэлэрэ быһаарар кыахтаныахтарын билиһиннэрдэ. Бүлүү улууһун тыатын хаһаайыстыбатын департаменын салайааччы, оройуон Сэбиэтин депутата Павел Иннокентьев Туһаайан этии түмүгүнэн санаатын үллэһиннэ:
— Ил Дархан Айсен Николаев Туһаайан этиитигэр тыа хаһаайыстыбатын салаатын сайдыытыгар чопчу этиилэри оҥордо, кини улуустарга улахан өйөбүлү биэрдэ дии саныыбын. Кэлэр сылтан улуус тыа хаһаайыстыбатын бородууксуйатын оҥорон таһаарыыга үбүлээһини бэйэтэ быһаарар буолуоҕа.
Дьэ, итиннэ улуус дьаһалтатын, оройуон Сэбиэтин, улуус табаары оҥорооччуларын быһаарыыларыттан улахан тутулуктаах буолуо. Ил Дархан Айсен Николаев 2030 сылга оҥорон таһарыыны 1,5 төгүл улаатыннарарга сорук туруорбута.
Тыа хаһаайыстыбатын салаата оҥорон таһаарара эт-үүт буолар.
Биһиги улуус тыа хаһаайыстыбатын бородууксуйатын оҥорон таһаарыытын улаатыннарарбытыгар үүт тутуутугар болҕомто ууруохпутун наада дии саныыбын. Тэрээһиннээх хаһаайыстыбалары, тыа хаһаайыстыбатын урбаанньыттарын ахсааннарын элбэтэн үүт соҕотуопкатыгар барыахпытын сөп.
Кэлэр сылларга биһиги сүөһүнү уотар балаһааккаларга болҕомто ууруохтаахпыт. Астыыр-үөлүүр пууннардаах сирдэргэ балаһааккалары тутан нэһилиэнньэҕэ хаачыстыбалаах эти тиэрдэргэ үлэлэһиэхтээхпит.
Ил Дархан Айсен Николаев тыа хаһаайыстыбаттын салаатын сайыннарарга улуустарга улахан эппиэтинэһи сүктэрдэ уонна эрэнэрин биллэрдэ. Биһиги эрэли толоруохпутун наада.
Николай Куприянов.