Г.И.Чиряев аатынан Бүлүү куорат 1 №-дээх оскуолатын 8 кылааһын үөрэнээччитэ Рашид Мусин бүлүүлэртэн бастакынан “Азия оҕолоро” VIII аан дойдутааҕы спортивнай оонньуулар мэтээллэрин ылары ситистэ.
Кини 80 киилэ ыйааһыннаахтарга өрөспүүбүлүкэ оҕолорго биир күүстээх мас тардыһааччыта, улахан күрэхтэһиилэр чемпионнара, призердара буолар. Кыһыл көмүс мэтээл иһин киирсиэ диэн эрэбил санаа баар этэ…
В.Г.Румянцев аатынан Бүлүүтээҕи оҕо спортивнай оскуолатын тириэньэрэ, Рашиды эрчийэр Георгий Борисовкүрэхтэһии хаамыытын бу курдук билиһиннэрдэ:
— Рашид бастакы киирсиитигэр Урал федеральнай уокуругун хамаандатын бэрэстэбиитэлин кыайбыта, иккис киирсиитигэр Саха сирин хамаандатыттан тэҥнээх, урут элбэхтик көрсүбүт утарылаһааччытын Роман Тарабукины 2:0 кыайбытын, анарааҥылар бырачыастаһан, маһын эрийэ тутта диэн мөккүһүү тахсан, эбии мас тардыһыыга2:1 ахсаанынан хотторон кэбистэ.
Итинник балыйсыылаах түгэн кэннэ үһүс миэстэ иһин киирсиигэ Рашид туох баар тулуурун киллэрэн туран Кахазстан бэрэстэбиитэлин кыайда уонна боруонса мэтээли ылары ситистэ.
Өрөспүүбүлүкэ чемпиона Рашид Мусины кытта кэпсэтиигэ, кини бэйэтэ күрэхтэһии тыҥааһыннаахтык барбытын, Саха сирин I хамаандатыгар киирэргэ туох баар санаатын ууран туран уһун кэмҥэ күүскэ эрчиллэн, элбэх уустуктары көрсөн үс түһүмэхтээх сүүмэрдээһини ааспытын, Саха сирин II хамаандатын бэрэстэбиитэлин Роман Тарабукины кытта мас тардыһыытыгар сыыһа быһаарыы тахсыбытын, оонньуулар бары кыттыылаахтарыгар, бүлүүлэргэ ситиһиилэри баҕарда.
Уһук Илин федеральнай уокурук хамаандатыттан кыттыбыт эмиэ Г.И.Чиряев аатынан Бүлүү куорат 1 №-дээх оскуолатын 8 кылааһын үөрэнээччитэ Ренат Николаевоонньууларга 4 миэстэни ылла. Кини күрэхтэһиигэ кыттыытын бу курдук билиһиннэрдэ:
— Мин Уһук Илин федеральнай уокурук хамаандатыттан70 киилэ ыйааһыннаахтарга күрэхтэстим. Бүгүн 4 киһини кытта мас тардыстым. Бастаан Урал федеральнайуокуругун уолун, онтон Казахстан мас тардыһааччытын кыайталаабытым. Салгыы Саха сирин хамаандатын спортсменнарыгар Саян Саввиновка уонна Владимир Роевка тахсан хоттортоотум.
Мас-рестлиҥҥэ күрэхтэһии “Модун” спорт комплексыгар тэрилиннэ. Бэҕэһээ Саха сирин хамаандатыгар бастакы кыһыл көмүс мэтээллэри мас тардыһааччылар ылан улахан үөрүүнү үөскэппиттэрэ. 50 кг Тимир Луковцев Саха сирин хамаандатыгар бастакы кыһыл көмүс мэтээл хаһаайынынан буолбута, Александр Захаров 60 киилэҕэ бастаан иккис кыһыл көмүс мэтээли ылары ситистэ.
Бүгүн 70 кг Саян Саввинов үрүҥ көмүс призер, 80 киилэҕэ Роман Тарабукин, 80 үөһэ ыйааһыннаахтарга Харысхан Габышев чемпионнарынан буоллулар.
Бүлүүттэн “Азия оҕолоро” VIII аан дойдутааҕы спортивнай оонньуулар мас тардыһыы көрүҥэр ситиһиилээхтик кыттан боруонса мэтээли ылбыт Рашид Мусины уонна ыйааһыныгар 4 миэстэ буолбут Ренат Николаевы, тириэньэрдэрин Георгий Борисовы, Власий Семеновы эҕэрдэлиибит, эдэр кэскиллээх спортсменнар саҥа чыпчааллары дабайалларыгар эрэнэбит, ситиһиилэри баҕарабыт!
Николай Куприянов.