Аны саас тэриллиэхтээх РФ Президенин быыбара улам-улам чугаһаан иһэр «тыына» биллэн эрэр: Бүлүү куоратын уулуссаларыгар быыбарга аналлаах баннердар ыйаннылар, бастакы сүбэ-мунньахтар саҕаланнылар.
Ахсынньы 22 күнүгэр Саха сирин Киин быыбардыыр хамыыһыйата күн бастакы аҥарыгар улуустарга быыбардары тэрийэр Территориятааҕы быыбардыыр хамыыһыйалар салалталарын, чилиэннэрин кытта «Арассыыйа Федерациятын Бэрэсидьиэнин быыбарыгар бэлэмнэнии» боппуруоһугар видео-сибээһинэн киэҥ сүбэ-мунньаҕы тэрийэн ыытта.
Киин быыбардыыр хамыыһыйа бэрэссэдээтэлэ Евгений Федоров сүбэ-мунньаҕы арыйарыгар, 2024 сыл кулун тутар 15-17 күннэригэр ыытыллар РФ Президенин быыбарыгар бэлэмнэнии боппуруостарыгар сиһилии тохтоото.
Киин быыбардыыр хамыыһыйа чилиэннэрэ бэлэмнэнии үлэтин сүрүн түгэннэрин билиһиннэрдилэр. Барыллаан былаан быһыытынан, Территориятааҕы быыбардыыр хамыыһыйалар үлэлэрин тохсунньу 29 күнүттэн саҕалыахтара, учаастактааҕы быыбардыыр хамыыһыйалар кулун тутар 6 күнүттэн үлэлиэхтэрэ.
Хас биирдии быыбар түһүмэхтэринэн ыытыллар бэйэтэ регламеннаах: тус-туһунан кэмнээх-кэрдиистээх, чуолкай болдьохтоох. Сүбэ-мунньахха састааптара ситэтэ суох УИК-тар резервэҕэ сылдьар чилиэннэрэ хамыыһыйаларга киирэргэ сайабылыанньаларын тохсунньу 31 күнүгэр диэри биэриэхтээхтэрэ санатылынна. РФ Президенин куоластааһын күннэрэ, бириэмэтэ, миэстэтэ олунньу 15 күнүттэн кулун тутар 6 күнүгэр диэри ыйыллыахтааҕа, кулун тутар 5 күнүгэр диэри быыбардааччылар испииһэктэрэ бэлэм буолуохтааҕа, кулун тутар 6 күнүгэр УИК-га бэриллиэхтээҕэ, быыбар түмүгүнэн УИК-тар боротокуоллара кулун тутар 18 күнүн сарсыарда 4 чааһы аһардыбакка ГАС «Выборы» ситимигэр киллэриллиэхтээхтэрэ этилиннэ.
Үгэс быһыытынан, быыбар хамыыһыйаларын чилиэннэригэр тэйиччиттэн үөрэхтээһин – РЦОИТ тестэрин туттарыы ыытыллара этилиннэ.
Киин быыбардыыр хамыыһыйа чилиэнэ Эльвира Мярикянова быыбардааччыларга информацияны тиэрдии, билиһиннэрии, куоластааһыҥҥа ыҥырыы чуолкай болдьохтоох үс түһүмэҕинэн ыытыллыаҕын иһитиннэрдэ.
Ааспыт быыбардарга «Мобильнай УИК» диэн бырайыак 11 улууска, ол иһигэр Бүлүү улууһугар үлэлээбитэ. Саха сиригэр УИК-тар 1154 чилиэннэрэ быыбардааччылар дьиэлэрин кэрийэ сылдьан быыбары билиһиннэрэр икки «долгуннара» тэриллибитэ. Сүбэ-мунньахха сааскы быыбарга «Мобильнай УИК» бырайыак бары улуустарга тэриллэр буолбута этилиннэ. Саха сиринээҕи киин быыбардыыр хамыыһыйа туруорсуутунан, сааскы быыбарга быыбардааччылар дьиэлэринэн кэрийэр сырыы биир эрэ «долгуна» ыытыллар буолбута ситиһиллибит.
Итини сэргэ, РФ Бэрэсидьиэнин быыбарыгар Арассыыйа үрдүнэн ыытыллар тэйиччиттэн куоластааһыҥҥа Саха сирэ кыттыбат буолбутун бэлиэтиэххэ сөп.
Видео-сибээһинэн сүбэ-мунньахха Бүлүү улууһун Территориятааҕы быыбардыыр хамыыһыйатын чилиэннэрэ кытыннылар, быыбары ыытыыны билистилэр.
Николай Куприянов.