Олунньу 8 күнүгэр Тас дойдулары кытары сибээс уонна Саха Өрөспүүбүлүкэтин норуоттарын дьыалаларыгар миниистири солбуйааччы Сергей Хатылыков салайааччылаах бөлөх 2 Күүлэт уонна Тылгыны олохтоохторун кытта көрүстэ.
2 Күүлэккэ отчуот иннинэ Үөрэҕирии министиэрстибэтиттэн Грамота уонна Махтал сурук туттарыыта буолла. Өрөгөй ырыатын уонна сыл түмүктэринэн оҥоһуллубут видеоролик кэнниттэн отчуот саҕаланна. Сергей Александрович отчуотун кулуупка мустубут дьон болҕомтолоохтук иһиттилэр.
2 Күүлэттэр ыйытыылара элбэх буолла. Ол курдук сүрүннээн саамай сытыытык турар боппуруостартан биирдэстэрэ мелиорация үлэтин боппуруоһа буолла. «Оттуур сирдэрбит ууга бараллар, эрэй бөҕөнү көрсөбүт», — диэн олохтоохтор этиннилэр. Ону таһынан сайыҥҥы суол туһунан эттилэр. «Суолбут кыһын эрэ баар, сайын сырыы суох. Оҥоһуллан испит суолу ситэриэххэ уонна самолет сырыытын элбэтиэххэ наада»,- диэтилэр. Бу этиилэргэ улуус баһылыгын бастакы солбуйааччы Иван Евсеев дивиденд харчыта сүрүннээн СВО-ҕа барарынан сибээстээн бытаарыы таҕыста, барыта кэминэн буоллаҕына муосталар тутуллубуттарын курдук эмиэ үлэ күүстээхтик салгыы барыа диэтэ.
Маны таһынан ууну ыраастыыр станция, балыыһаҕа техника, өртөөһүн, специалистар олорор дьиэлэрин туһунан уонна да атын ыйытыылар, этиилэр киирдилэр. Бу барыта своднай протоколга киирдэ, тустаах тэрилтэлэргэ тиэрдиэхпит диэтилэр.
Тылгыныга
Тылгыныга дьон эмиэ элбэх ыйытыылардаах, этиилэрдээх буолла. Ол курдук саҥа оскуола, спортзал, балыыһа лабораториятын тутуута, сэрии кэмин оҕолоругар көмө, самолет көтүүтэ, санавиация түүннэри сырыыта уонна да атын боппуруостар.
Бу икки нэһилиэктэргэ заправка туһунан элбэхтик этиннилэр. Күүлэт эҥэр саатар биир заправка баара буолара буоллар дииллэр. Куораттан баран бензин, солярка куттарбытыгар эрэйдэри көрсөбүт диэн икки нэһилиэк олохтоохторо күүскэ этиннилэр. Онуоха бу кыһалҕа быһаарылларын туһугар сокуоҥҥа уларыйыылар тахсыахтаахтар эбит. Ил Түмэн дьокутааттара үлэлэһэн уларытыы киллэрдэхтэринэ бензин, солярка куттар заправка баар буолуон сөп диэтилэр.
Василина Татаринова.