Саҥа сыл ааннары тоҥсуйда
Саргылаах түгэҥҥэ ыҥырда,
Сандаарар уоттарын уматта,
Сылаастык мичээрдии сыдьаайда…
Симэнэ харыйа киэргэйдэ
Суһумнуу, дьиримнии мичийдэ,
Сиэдэрэй өҥүнэн дьэргэйдэ,
Сүрэхпит үөрүүнэн битийдэ…
Саргылаах саҥа дьыл түүнүгэр
Сирдээҕи дьолбутун сиэтиэҕиҥ,
Салаллар абылыыр кэмигэр
Сылбытын айхаллыы көрсүөҕүҥ…
Ситиһии батыһа сылдьыахтын,
Сайдыыга эрэлбит үрдүөхтүн,
Сып-сырдык, ып-ыраас ырабыт
Саҥа дьыл сырсыһа сылдьыахтын!..
Ульяна Ива.28.12.2018.
Саҥа Дьыл үүнүөҕэ…
Дьиктилээх
Саҥа Дьыл үүнүөҕэ
Алыптаах түгэнэ үөрдүөҕэ,
Соһуччу бэлэҕин биэриэҕэ,
Ырабыт бу күҥҥэ ситиэҕэ…
Дьиримниир тырымнас уотунан,
Мүөт дыргыл минньигэс сытынан,
Харыйа дьиэ иһин толоруо
Сып-сылаас сырдыгар угуйуо…
Хас биирдии сүрэҕи долгутан
Саҥа Дьыл ааннарын аһыаҕа,
Сандаарар уотунан ыҥыран
Харыйа дьиримнии туруоҕа…
Тулалыыр алыпка уйдаран
Куба хаар тэлимнии түһүөҕэ,
Талбаарар дьиктигэ куустаран
Саҥа Дьыл үөрүүтүн түстүөҕэ…
Ульяна Ива.