Соторутааҕыта түмүктэммит Саха сирин Үөрэнээччилэрин спартакиадаларыгар Бүлүү улууһун эдэр саахыматчыттарын хамаандата IV миэстэни ылары ситистэ. Ити туһунан Бүлүү улууһун саахымакка федерациятын бэрэссэдээтэлэ Александр Григорьев билиһиннэрдэ:
— Биһиги эдэр кэскиллээх саахыматчыттарбыт Сарыал Алексеев, Толя Варфоломеев, Алгыстаана Шумилова уонна Сайаара Катанова Үөрэнээччилэр спартакиадаларыгар Саха сирин улуустарын, улахан куораттар эдэр күүстээх саахыматчыттарын кытта 9 турга күөн көрүстүлэр. Саахымат күрэхтэһиитигэр барыта 29 хамаанда кыттыбытыттан биһиги оҕолорбут 4 миэстэни ыллылар. Биһиги үһүс миэстэҕэ тахсыбыт Уус Алдан саахыматчыттарын кытта очукуобут тэҥ буолан таҕыста эрээри, коэффициенынан 4 миэстэ буоллубут. Бастакы миэстэни Дьокуускай куорат, иккиһи – Мииринэй хамаандалара ыллылар.
Эдэр саахыматчыттары күрэхтэһиигэ тириэньэр Сардаана Захарова илдьэ сырытта, Бүлүүттэн тириэньэрдэр Александр Васильев, Иван Егоров күүс-көмө буоллулар.
Г.И.Чиряев аатынан Бүлүү куорат 1 №-дээх оскуолатын 7 кылааһын үөрэнээччитэ Сарыал Алексеев өрөспүүбүлүкэ бастыҥ оонньооччуларын кытта бастакы дуоскаҕа кииристэ уонна 3 бочуоттаах миэстэни ылары ситистэ, хамаандаҕа элбэх очукуону биэрдэ. Кини былырыын өрөспүүбүлүкэ 8 эдэр бастыҥ оонньооччуларын ортолоругар киирбитэ, Илин Уһук уокуругун үөрэнээччилэрин чемпионатыгар 7 миэстэни ылары ситиспитэ, улахан дьоҥҥо улуус күрэхтэһиилэрин кыайыылааҕа, призера буолар.
3 дуоскаҕа 6 миэстэни Алгыстаана Шумилова ылбыта биһигини үөрдэр.
Былырыыҥҥы спартакиадаҕа биһиги хамаандабыт иккис миэстэни ылбытын санатыахха сөп. Ити курдук, эдэр саахыматчыттарбыт иккис сылын улахан таһымнаах күрэхтэһиигэ бигэ түмүктэри, инникилэр кэккэлэригэр сылдьалларын, кэскиллээхтэрин көрдөрдүлэр.
Николай Куприянов.