Балаҕан ыйын 27 күнүгэр М.Н. Жирков аатынан Култуура дыбарыаһыгар Саха Өрөспүүбүлүкэтин Судаарыстыбаннаһын күнүгэр аналлаах үөрүүлээх мунньах буолла.
Дьон-сэргэ толору мустубут саалатыгар историческай тыыннаах көрдөрүүнэн уонна Россия, Саха сирин өрөгөй ырыаларын толоруунан мунньах саҕаланна. Президиумҥа СӨ Бырабыыталыстыбатын уонна дьаһалтатын салайааччыта Георгий Михайлов, Бүлүү улууһун баһылыга Сергей Винокуров, Бүлүү куоратын баһылыга Ян Попов, Оройуон Сэбиэтин бэрэссэдээтэлэ Гаврил Корякин, Ил Түмэн депутата, «Сахатранснефтегаз» кылаабынай инженерэ Александр Гоголев, СӨ Общественнай палататын чилиэнэ, Ил Түмэн Ыччат Парламенын бэрэссэдээтэлин бастакы солбуйааччыта Айтал Керемясов, ыччат миниистрин солбуйааччы Надежда Мохначевская уонна да атыттар кыттыыны ыллылар, тыл эттилэр, мустубут дьоҥҥо эҕэрдэлэрин тириэртилэр.
Бу күн элбэх биир дойдулаахтарбыт Ил Дархантан, СӨ Бырабыыталыстыбатыттан, улуус уонна куорат дьаһалталарыттан үрдүк наҕараадалары, бочуоттаах Грамоталары, махтал суруктары, бэлиэлэри туттулар.
Тэрээһин биир долгутуулаах түгэнинэн 14 саастарын туолбут оҕолорго Россия гражданнара буолалларын туоһулуур бастакы дьоһуннаах докумуоннарын – паспортары туттарыы буолла.
Ону тэҥэ икки күн устата ыытыллыбыт «Аржаков фест» диэн ыччат фестивалын түмүктэрин таһаарыы буолла. Мустубут дьон ытыстарын тыаһын доҕуһуолугар сыаналаах бириистэри, грамоталары туттардылар.
Сахабыт сирин Судаарыстыбаннаһын бэлиэтиир үөрүүлээх тэрээһин талааннаах биир дойдулаахтарбыт ырыаларынан киэргэтилиннэ, үрдүк таһымнаахтык ыытылынна.
Василина Татаринова.