Светлана Иванова салайааччылаах ыаллар далбар хотун эбээлэрин, ийэлэрин, байыаннайдар кэргэннэрин түмэр «Харысхал» түмсүү волонтердара Бүлүүттэн төрүттээх анал байыаннай дьайыы кыттыылаахтарыгар бэйэлэрин үптэринэн, төһө кыалларынан ис сүрэхтэриттэн араас кэриҥнээх көмөнү оҥороллор.
Волонтердар В.О.Каратаев аатынан Олоҥхо дьиэтигэр хаххалыыр сиэккэлэри тигэллэр, олус наадалаах таҥас-сап, мал хомуйаллар, байыаннайдар дьонноруттан аадырыстаммыт баһыылкалары, нэһилиэктэр түмсүүлэрэ ыыппыт малларын-салларын мунньаллар уонна СВО буола турар сиригэр ыыталлар. Түмсүү малы-салы таксинан Дьокуускайга ыытар, сөмөлүөккэ таһаҕаһы босхо туталлар, Москубаҕа көрсөн ылаллар уонна СВО буола турар сиригэр ыыталлар, тирэх пууннарынан тарҕаталлар уонна байыаннайдарга быһаччы туттараллар.
Байыаннайдар түмсүү ыам ыйын 3 күнүгэр ыыппыт дойдуларыттан, дьонноруттан аадырыстаах баһыылкалары, хаххалыыр сиэккэлэри тутаннар үөрүүлэрэ үгүс.
Соторутааҕыта «Харысхал» түмсүү Хабаровскай, Москуба госпиталларыгар эмтэнэр байыаннайдарга дойдуларын амтаннаах аһын-үөлүн ыыппыта. Түмсүү кыттыылаахтара куруук күүс-көмө буолар «Сыа Бүлүү» кэпэрэтиип кэлэктиибигэр, дириэктэр Алексей Кондратьевка махталлара улахан. Кэпэрэтиип эт кэнсиэрбэлэри, барыанньа, сироп арааһын босхо биэрэр.
Түмсүү тэрээһиннэригэр элбэх үтүө санаалаах Бүлүү дьоно, тэрилтэлэр ис санааларыттан кыттыһаллар, таксилар суоппардара Дьокуускайга диэри гуманитарнай көмөнү босхо тиэрдэллэр.
СВО кыттыылаахтарыгар Светлана Бубякина салайааччылаах Бүлүү куорат 5 №-дээх аптеката 70 тыһ. солк. суумалаах эмп-том ыыппытын, Зоя Протопопова уонна Саргылана Егорова салайааччылардаах «Наша аптека» уонна «Ника» аптекалар хаһыс да төгүллэрин араас эми, маастары, биинтэлэри ыыппыттарын бэлиэтиэххэ сөп.
Сардана Сыроватская салайааччылаах «Иис абылаҥа» түмсүү, Александра Хабытчарова Өймөкөөн сылгытын сиэлиттэн сүүсчэкэ кыракый дэйбиир харысхаллары оҥорон, Чочу бэтэрээннэрэ тэтиҥ маһыттан харысхаллары оҥорон аҕалбыттара. «Сыа Бүлүү» кэпэрэтиип маҕаһыынын атыыһыта Галина Максимова 7 тыһ. солк. суумаҕа ис таҥас, наскы атыылаһан көмө оҥордо.
87 саастаах үтүөлээх учуутал Павлина Даниловна Иванова байыаннай дьайыы кыттыылаахтарыгар сэмэй бэлэҕин ыыппыта, мас, тимир ууһа Иннокентий Акимов этиҥ түспүт маһыттан харысхал оҥорон туттарда, Тамара Фомина харысхал оҥорорго аҕалбыт үөрэ отунан, Людмила Большакова Бүлүү ыллыыр кырылас кумаҕынан толоруллубут мөһөөччүктэри тигэн аҕалан түмсүү кыттыылаахтара харысхал оҥордулар. Матрена Спиридонова этиҥ түспүт маһыттан эмиэ харысхал оҥордо.
Ыам ыйын 14 күнүгэр «Харысхал» түмсүү 12 төгүлүн СВО кыттыылаахтарыгар аадырыстаммыт баһыылкалары ыытта.
Анна Егорова салайааччылаах балыыһа үлэһиттэрин түмсүүтэ 2 араас хаххалыыр сиэккэлэри аҕалан туттарбыттар. Анна Егорова 5 тыһ. солк. матырыйаалы бэйэтин үбүнэн атыыласпыт. Бүлүү куорат бэтэрээннэрэ массыынаны бүрүйэр икки хаххалыыр сиэккэни баайдылар. Октябрина Иванова салайааччылаах Кыһыл Сыырдааҕы «Сила горячих сердец» түмсүү 8 баһыылканы уонна хаххалыыр сиэккэлэри, 5 тыһ. солк. суумаҕа «Сыа Бүлүү» эт кэнсиэрбэтин ыыттылар, «Кыайыы вальса» куонкурус кыайыылаахтара Светлана Павлова, Розалия Гаврильева, Тамара Фомина харчы, араас таҥас, сухпаек, барыанньа туттардылар.
«Харысхал» түмсүү үтүө санаалаах волонтердара байыаннай дьайыыга кыттар биир дойдулаахтара чэгиэн сылдьалларыгар, дойдуларыгар этэҥҥэ эргиллэн кэлэллэригэр күннэрин-дьылларын аахсыбакка, бэйэлэрин үптэринэн төһө кыалларынан ис-сүрэхтэриттэн күүс-көмө буола сатыылларыгар барҕа махтал буоллун! Кинилэр норуот көмөтүн түмэр дьоһуннаах үлэлэрин сыанабылынан СВО кыттыылаахтарын махтал тыллара буолар.
Николай Куприянов.