Дойдубут үрдүнэн анал байыаннай дьайыы саҕаламмыта номнуо балтараа сыл буолла. Улууспутуттан хомуур бастакы күннэригэр элбэх эр киһи дьоннорун алгыс, өйөбүл тылларын ылынан, бу киһи тыыннаах төттөрү эргиллэрэ биллибэт ыраах айаныгар күүстээх санааны ылынан, тыыннаах эргиллиэхпит диэн туруммуттара. Манна биһиги күтүөппүт, 2 Күүлэт олохтооҕо, дьаһалта землеустроителэ Афанасьев Василий Прокопьевич мобилизациянан, бэбиэскэ тутан, эмиэ бэйэтин курдук уолаттары кытары бииргэ төннүбэт айаныгар туруммута.
Вася 1995 сыллаахха Үгүлээт орто оскуолатын үөрэнэн бүтэрбитэ. «Үгүлээт» АОЗТ кочегарынан, оскуолаҕа компьютер технигинэн үлэлээн баран, 1999 сыллаахха армия кэккэтигэр ыҥырыллан, сулууспалыы барбыта. Икки сылынан дойдутугар эргиллэн кэлэн, Үгүлээт орто оскуолатыгар физкультура, математика учууталынан үлэлээбитэ. Онтон 2004 сыллаахха олоҕун аргыһын Надятын көрсөн, ыал буолан, 2 Күүлэккэ көһөн кэлбитэ. Манна АТС монтерунан, оскуолаҕа компьютер технигинэн уонна бу анал байыаннай дьайыыга барыар диэри дьаһалта землеустроителинэн үтүө суобастаахтык үлэлээбитэ. Афанасьевтар 2 кыыс оҕоломмуттара. Вася Күүлэккэ кэлэн, күтүөт, үлэһит быһыытынан уонна барыга бары сатабылынан дьонугар биһирэппитэ. Кини бу аныгы сыыппара үйэтин кытары тэҥҥэ хардыылыыр исписэлиис буоларын бары билбиппит, нэһилиэккэ кэлэн турар цифровой телевидение, сибээс вышкаларын туруорууга, настройкалааһыҥҥа үгүстүк үлэлэспитэ. Хас биирдии ыалга интернет сибээһин киллэрэн, ол сөптөөхтүк үлэлиирин ситиһэрэ. Оннооҕор чаас суруттаран ылан, сотовай телефоннары өрөмүөннүүрэ. Үгүлээт да, 2 Күүлэт да дьоно-сэргэтэ кини туһунан үтүө тылларынан саныыллар. Биир идэлээхтэригэр — улууспут нэһилиэктэрин землеустроителлэригэр кэлэр саҥа программалары, уларыйыылары түргэнник билэн, баһылаан элбэхтик көмөлөспүтүн ахталлар.
Украинаҕа барбыт күнүттэн ыла дьонун, табаарыстарын кытары сибээһин быспакка, ахтылҕанын таһааран кэпсэтэн, видеонан сибээстэһэ турбута. Барыбытыгар бүтэһиктээхтик олунньу 18 күнүгэр суруйбута. 2023 сыл олунньу 19 күнүгэр бойобуой соругу толоро сылдьан, сырдык тыына быһынна диэн биллэрии кэлбитэ. Бу сурукка маннык: «Афанасьев Василий Прокопьевич, 13.07.1978 г., уроженец Чукарского наслега Ленинского района Якутской АССР, погиб 19 февраля 2023 года в г. Угледар ДНР при выполнении боевой задачи, группа радистов разведчиков, в составе которой находился Василий, организовала наблюдательный пост в здании с целью обнаружения противника, здание в котором находилась подгруппа подверглась массированному артиллерийскому обстрелу противника. В результате которой гвардии рядовой Афанасьев В.П. получил ранения несовместимые с жизнью. Сослуживцы, из-за интенсивного артиллерийского обстрела, не смогли забрать тело. Местонахождение тела: н.п. Угледар, район «Верхних дач» Донецкой Народной Республики».
Бу сыл олунньу 19 күнүгэр 2 Күүлэт нэһилиэгэр анал байыаннай дьайыы кыттыылааҕа, күтүөппүт Афанасьев Василий Прокопьевич сырдык кэриэһигэр анаммыт киэҥ тэрээһин буолла. Манна улуус баһылыгын социальнай боппуруостарга солбуйааччы Прокопьев Александр Анатольевич салайааччылаах делегация: улуус сиргэ уонна баайга-дуолга сыһыаннаһыыларын отделын начальнига Атласова Зоя Васильевна, Росгвардия майора, байыаннай дьайыылар бэтэрээннэрин улуустааҕы Сэбиэтин бэрэссэдээтэлэ Константинов Афанасий Николаевич уонна анал байыаннай дьайыы кыттыылааҕа, бэтэрээн Афанасьева Октябрина Семеновна, маны сэргэ Үгүлээттэн аймахтара, ыаллыы сытар Тылгыны, 1 Күүлэт, Үгүлээт хамаандалара, бииргэ үлэлээбит коллегалара, табаарыстара, нэһилиэгин бар дьоно кэлэн кытыннылар.
Бу тэрээһин кэлэр кэнчээри ыччаппытыгар патриотическай иитиигэ биир сүрүн хардыынан буолла. Ол курдук Н. А. Алексеев аатынан 2 Күүлэт орто оскуолатыгар бастыҥ үөрэнээччигэ Василий аатын сүгэр көһө сылдьар «Герой паартата» арылынна. Афанасий Николаевич уонна Октябрина Семеновна оскуола улахан кылааһын оҕолоругар «Эр санааланыы уруоктарын» ыыттылар.
Бу күн Күүлэт түбэтин нэһилиэктэригэр буулдьанан ытыыга кустовой күрэхтэһии буолла. Бу күрэхтэһиигэ 1 Күүлэт, Тылгыны, Үгүлээт, 2 Күүлэт 7-лии киһилээх хамаандалара кытыннылар. Күрэхтэһии түмүгүнэн кыайыылааҕынан — Үгүлээт хамаандата, 2 Күүлэт хамаандата — 2-с миэстэ, Тылгыны хамаандата 3-с миэстэ буоллулар. Маны таһынан Баһылайбыт аймахтара анал ааттары туттардылар: «Кыра саастаах ытааччы» — Лущевская Ванесса (Тылгыны), «Аҕа саастаах ытааччы» — Тутукаров А. А. (1 Күүлэт), «Бастыҥ бэтэрээн ытааччы» — Алексеева Т. Х. (2 Күүлэт), «Кэскиллээх ытааччы» — Дмитриев Саша (2 Күүлэт), «35-тэн аллараа саастаах ытааччы» — Спиридонова Надежда (Үгүлээт), «Бастыҥ эр киһи ытааччы» — Прокопьев С.Н. (2 Күүлэт), «Бастыҥ кыыс ытааччы» — Колтовская Майя, «Бастыҥ бэргэн ытааччы» — Николаев А.А. (2 Күүлэт).
Бу биһиэхэ, дьонугар, улахан суолталаах тэрээһини тэрийбит 2 Күүлэт нэһилиэгин баһылыгар Юрий Иванович Спиридоновка, нэһилиэк бары тэрилтэлэрин салайааччыларыгар уонна хас биирдии үлэһиттэригэр, суоппардарга: Михаилга, Валерийга, Харлампийга, күтүөппүт табаарыстарыгар, аймахтарбытыгар, нэһилиэкпит бары олохтоохторугар, Бүлүү улууһун «Харысхал» волонтерскай түмсүүтүгэр, Күүлэт түбэтин хамаандаларыгар дириҥ махталбытын биллэрэбит. Эһиги хас биирдиигит күүстээх өйөбүлэ биһиэхэ бу ыарахан, хараҥа күннэрбитигэр күүспүтүгэр күүс эптэ. Барыгытыгар олоххо сырдык, ыраас, эйэлээх инникини, эрэли, дьолу-соргуну, туох баар үтүөнү баҕарабыт. Баһылайбыт туһунан сырдык өйдөбүл үйэлэргэ сүппэтин.