Бүлүү улууһун Тааһаҕарыгар билигин тэрээһиннээх хаһаайыстыбалар ынах сүөһүлэрин тутар, инникитин кэтэх сүөһүнү көрүөхтээх саҥардыллыбыт “Боһоҥдо” сайылык үлэтин саҕалаата. «Дабаан» кэпэрэтиип нөҥүө сайылыкка билиҥҥи туругунан улуус, нэһилиэк үптэринэн 4 эбийиэк тутулунна. Олохтоохтор сайылыкка элбэх субуотунньугу тэрийбиттэрэ. Билигин сайылыкка 70 ыанар ынаҕы туталлар.
Тааһаҕар сайылыгар Евгений Потапов салайааччылаах тэрээһиннээх хаһаайыстыба икки сыл кэтэхтэр ынахтарын көрөн-истэн, ыан үүттэрин туттарбыта. Бары өттүнэн табыгастаах тэрээһин ынах төбөтүгэр субсидия көрүллээтин кытта тохтообута.
Билигин Тааһаҕарга бары көрүҥнээх хаһаайыстыбаларга 550 ынах сүөһүнү туталлар. Олохтоох дьаһалта ынах сүөһү ахсаанын энчирэппэт, үүтү туттаран оҥорон таһаарыыны көҕүлүүр, үлэлиир баҕалаах дьону өйүүр соруктаах үлэлиир-хамсыыр.
Павел Иннокентьев салайааччылаах тыа хаһаайыстыбатын департамена уонна Тааһаҕар баһылыга Семен Каратаев хас да сыллаах үлэлэрин түмүгүнэн кэтэх уонна тэрээһиннээх хаһаайыстыбалар ынахтарын бииргэ тутар соруктаах сайылык сөргүтүлүннэ. Нэһилиэк баһылыгын этиитэ болҕомтоҕо ылыллан, элбэх тэрээһин, тутуу үлэлэрэ ыытылынна, үбүлээһин оҥоһулунна.
«Дабаан» кэпэрэтиип нөҥүө сайылыкка билиҥҥи туругунан улуус, нэһилиэк үптэринэн 4 эбийиэк тутулунна. Олохтоохтор сайылыкка элбэх субуотунньугу тэрийбиттэрин ахталлар. Сотору кэминэн саҥардыллыбыт сайылыгы үөрүүлээх арыйыы тэриллиэхтээх. Билигин сайылыкка 70 ыанар ынаҕы туталлар.
— Ааспыт нэдиэлэҕэ сүөһүлэрин сайылыкка таһааран үүт ыаһынын саҕалаатылар. Билигин тэрээһиннээх хаһайыстыбалар сүөһүлэрэ таҕыста, эһиилгиттэн кэтэх дьон сүөһүтүн таһаарар былааннаахтар. Хаһаайыстыба кэпэрээссийэ ньыматынан үүккэ үлэлиирдии былаанныыр. Маннык тэринии биһиэхэ нэһилиэк таһымыгар тэрээһиннээх хаһаайыстыба кэтэх сүөһүнү көрүүгэ бастакы холобура буолар, — диэн Павел Иннокентьев кэпсээтэ.
Тыа хаһаайыстыбатын салаатын урбаанньыта Евгений Потапов Агростартап бырагырааматыгар икки сыл кыттыбыта да, кыайан өйөммөтөҕө. Тыа хаһаайыстыбатын департамена былырыын ынах сүөһүнү көрөн үлэлиир баҕалаах урбаанньыты өйөөн, улуус иһинээҕи агростартап бырагырааматын оҥорон кытыннарбыта. Үбү икки сылга ыларга сүбэлэһии баттаммыта. Евгений Потапов бэйэтэ эмиэ элбэх сүөһүлээх, бырагыраама быһыытынан быйыл хотонун каркаһын туруоран, муосталаан иккис траншын харчытын ылыахтаах.
Билигин ынах сүөһү ахсаана аҕыйыы, сааһырбыт дьон сүөһү тутартан аккаастанар кэмнэригэр урбаанньыт нэһилиэгэр дьон эһэр сүөһүтүн тутуохтаах. Итинник тэрээһин үбэ, экономиката чочулуннаҕына инникилээх хамсааһын буолуо диэн эрэниэххэ.
Николай Куприянов.
Мария Поскачина фотолара.