Олунньу 7 күнүгэр Тааһаҕарга Арассыыйаҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччи быйылгы сылларыгар аналлаах байыаннай дьайыылар бэтэрээннэрин Кубогар Росгвардия уонна Юнармия кылаастара кыттыылаах сэргэх күрэхтэһии тэрилиннэ.
Байыаннай дьайыылар бэтэрээннэрин Кубогын күрэхтэһиитин сүрүн сыалынан-соругунан байыаннай дьайыыларга, СВО-ҕа кыайыы туһугар сырдык олохторун биэрбит биир дойдулаахтарбыт ааттарын үйэтитии буолар. Итини сэргэ, Кубок күрэхтэһиитин тэрийии эдэр ыччаты Аҕа дойдуну көмүскүүргэ бэлэм буоларыгар, өйүн-санаатын, күүһүн-уоҕун, сатабылын сайыннарыыга, патриотизм тыыныгар иитиигэ туһуланар.
Кубок күрэхтэһиитигэр Бүлүү куорат Г.И.Чиряев аатынан 1 №-дээх, Г.С.Донской аатынан 2 №-дээх, Герой Н.С.Степанов аатынан 3 №-дээх, Тааһаҕар, Сыдыбыл, Бороҕон, Хампа, Чернышевскай оскуолаларын хамаандаларын Росгвардия уонна Юнармия кылаастара кытыннылар.
Кубок күрэхтэһиитин үөрүүлээх арыйыыга былаах көтөҕүлүннэ, байыаннай дьайыылар бэтэрээннэрин улуустааҕы тэрилтэтин бэрэссэдээтэлэ Афанасий Константинов, Тааһаҕар нэһилиэгин баһылыга Семен Каратаев, оскуола дириэктэрэ Капитон Львов, байыаннай дьайыылар бэтэрээннэрэ уо.д.а. кытыннылар.
Эдэр юнармеецтар, росгвардеецтар ырыаны, стройу көрүүгэ, «Патриот оҕо хараҕынан» истиэнэ хаһыатын таһаарыыга, автомат маҕаһыынын иитиигэ, АК-74 автоматы ыһыыга-хомуйууга, ОЗК (общевойсковой защитнай комплект) кэтиитигэр, тутум эргииргэ, пневматика саанан ытыыга, байыаннай эстафетаҕа куоталастылар. Күрэхтэһиигэ байыаннай дьайыылар бэтэрээннэрэ сүрүннүүр судьуйаларынан сырыттылар
Күрэхтэһии 5 көрүҥэр кыайбыт Тааһаҕар оскуолатын хамаандата бастакы миэстэни ылла, иккискэ – Чернышевскай, үһүскэ — Герой Н.С.Степанов аатынан 3 №-дээх оскуолалар хамаандалара таҕыстылар.
Күрэхтэһии түмүктэниитэ эдэр юнармеецтар уонна росгвардеецтар күүстэринэн СВО кыттыылаахтарын пуондатыгар көмө аһымал кэнсиэр тэрилиннэ, кыайыылаахтарга наҕараадалар, кырааматалар туттарылыннылар.
Сүрүн тэрийээччи — Росгвардия Бүлүүтээҕи филиалын салайаччы, байыаннай дьайыылар бэтэрээннэринулуустааҕы тэрилтэтин бэрэссэдээтэлэ, Юнармия улуустааҕы ыстаабын начальнига, улууска Росгвардия кылаастарын салайааччы, полиция майора Афанасий Константинов күрэхтэһии туһунан санаатын үллэһиннэ:
— Маннык ис хоһоонноох күрэхтэһиилэри сылга үстэ-түөртэ ыытабыт. Быйылгы бастакы күрэхтэһиигэ оҕолор бэлэмнэрэ биллэ үрдээбитэ, бэлэмнэммиттэрэ көстөр.Аһымал кэнсиэргэ кыттааччылар 20-тэн тахса нүөмэрдэри туруорбуттара хайҕаллаах. Күрэхтэһии үчүгэйдик барбытын бэлиэтиэм этэ. Нэһилиэк дьаһалтатын, оскуола өттүлэриттэн тэрээһин олус үчүгэй. Кинилэргэ улахан махталбытын тиэрдэбит!
Эдэр ыччакка байыаннай күрэхтэһиилэри тэрийэн ыытыы патриотизм тыыныгар иитии, уһуйуу биир көрүҥэ буолар. Дьэ, итиннэ, байыаннай дьайыылар бэтэрээннэрин улуустааҕы тэрилтэтэ сүҥкэн кылаатын киллэрэр.
Итини сэргэ, Тааһаҕарга, РФ үтүөлээх юриһа Н.Н.Каратаев аатынан оскуолаҕа гражданственность түмэлэ арылынна. Түмэл үүнэр көлүөнэ ыччаты ийэ дойдуга бэриниилээх буоларга иитиэҕэ, түмэлгэ сэрии, тыыл, үлэ бэтэрээннэрэ, байыаннай дьайыы кыттылаахтара, нэһилиэк биллиилээх дьонноругар аналлаах экспозициялар туруоруллуохтара.
Николай Куприянов.
Александра Хабытчарова фотолара.