Бүгүн Тааһаҕар нэһилиэгэр «АЛРОСА» хампаанньа дивиденин үбүлээһининэн тутуллубут Кыайыы искибиэрин уонна бырааттыы Харатаайаптарга аналлаах стеланы арыйыы үөрүүлээх тэрээһинэ буолан ааста.
Нэһилиэк баһылыга Каратаев Семен Самуилович, бэтэрээннэр сэбиэттэрин бэрэссэдээтэлэ Григорьева Наталья Дмитриевна, сэрии сылын оҕото Павлова Мария Егоровна кыһыл лиэнтэни быстылар. Кинилэри сэргэ тэрээһиҥҥэ сэрии сылын оҕолоро, бэтэрээннэр, ытык кырдьаҕастар, нэһилиэк олохтоохторо кыттыыны ыллылар.
Үөрүүлэрини үллэстэн эҕэрдэ тыл эттилэр: нэһилиэк баһылыга Каратаев Семен Самуилович, муниципальнай сулууспа бэтэрээнэ, нэһилиэк бочуоттаах олохтооҕо, өр кэмнэргэ нэһилиэк баһылыгынан үлэлээбит Поскачин Афанасий Петрович, Бүлүү оройуонун сэбиэтин депутата Константинов Егор Ревович, Тааһаҕар нэһилиэгин бэтэрээннэрин сэбиэтин бэрэссэдээтэлэ Григорьева Наталья Дмитриевна, Харлампьевтар, Каратаевтар ааттарыттан Харлампьева Мария Егоровна.
Улуу буойуттарга сүгүрүйэн туран гирлянда уонна сибэкки дьөрбөтө уурулунна.
Оскуола иһинэн тэриллибит орто сүһүөх үөрэнээччилэрин Росгвардия кылааһа строевой хаамынан байыаннай бэлэмин көрдөрдө.
Нэһилиэк олохтоохторо Улуу Кыайыыны уһансыбыт улуу дьон үрдүк ааттарыгар сүгүрүйэллэр, үйэлэргэ махтаналлар.
Ульяна Григорьева.