Тааттаҕа «Ыллаа-туой, байааным» күрэс үрдүк таһымнаахтык ыытылынна

Ытык Күөлгэ Саха Өрөспүүбүлүкэтин норуотун хаһаайыстыбатын үтүөлээх үлэһитэ, култууратын, муниципальнай сулууспатын туйгуна, Томпо улууһун Байаҕантай уонна Таатта улууһун Октябрьскай нэһилиэктэрин бочуоттаах олохтооҕо Николай Тулааһынап төрөөбүтэ 70 сылыгар анаммыт өрөспүүбүлүкэтээҕи «Ыллаа-туой, байааным» диэн баянистар, аккордеонистар, гармонистар күрэхтэрэ ситиһиилээхтик буолан ааста.

Байаан дьүрүскэн кэрэ тыаһыгар уйдаран, 100-тэн тахса кыттааччы араас улуустартан: Тааттаттан, Чурапчыттан, Мэҥэ Хаҥаластан, Намтан, Хаҥаластан, Бүлүүттэн, Дьокуускай куораттан, орто анал, үрдүк үөрэх кыһаларыттан, искусство оскуолаларын элбэх иитиллээччилэрэ уонна  байааны олох аргыһа оҥостубут любитель-байаныыстар кытыннылар.Барыта 104 кыттааччы, 98 байааҥҥа күрэхтэһээччи, 6 чулуу ырыаһыттар ол иһигэр 11 профессионал-байаныыстар, 9 любитель-байаныыстар, 26 байаан кылааһыгар үөрэнэр оҕолор, 10 байаан ансаамбыллара.

Ыллыыр кумахтаах Тойон-Сыа Бүлүү сириттэн 6 киһилээх делегация «Аккорд»  байаныыстар бөлөхтөрө: Виктор Платонов, Геннадий Егоров, Алексей Иванов, Елена, Иван Туласыновтар  уонна ымыылаах ырыаһыт, Аркадий Алексеев ырыаҕа күрэҕин «Бастыҥ ырыаһыта» номинация кыайыылааҕа Бөтүҥтэн көмүс куоластаах Николай Иванов олус ситиһиилээхтик кытыннылар.

Таарыччы Таатта оройуонугар 1977 cыллаахха тэриллибит Саха интеллигенциятын, остуоруйатын, олоҕун-дьаһаҕын кэпсиир-ипсиир Чөркөөх музейыгар сырыттыбыт. Манна Иван Туласынов мэник-тэник оҕо сааһыгар бииргэ оонньуур доҕотторунаан Уолба  таҥаратын дьиэтэ Чөркөөххө көһөн кэлэн рестоврацияламмыт кэмнэригэр музейга ананан кэлбит ЯРОМ ЧМП КПОФ -№ 413 сурунаалга регистрацияламмыт  Бүлүү куоратын таҥаратын дьиэтин куолакалын таһаарсыбыт түгэннээх. Бу үтүө-сэдэх түгэни мүччү туппакка, музей сотрудниктарын көҕүлээһиннэринэн, Бүлүү куолакалын дьиҥ-чахчы илиибитинэн тутан-хабан, үөһэ колокольняҕа тахсан, куолакаллары охсон, тыас таһааран, киэҥ куйаарга эйээрэ көтүттүбүт.

Бу улахан таһымнаах өрөспүүбүлүкэтээҕи тэрээһиҥҥэ любитель-байаныыстар икки ардыларыгар күрэххэ Гран-При хаһаайынынан буолбут Саха Өрөспүүбүлүкэтин култууратын үтүөлээх үлэһитэ, Н.И.Ылахова аатынан «Алгыс» национальнай-култуурунай киин  үлэһитэ Иван Туласынов убаһа бирииһинэн наҕараадаланна. 3 истиэпэннээх лауреат аатын Гражданскай авиация үтүөлээх үлэһитэ, байаныыс, мелодист Виктор Платонов сыаналаах бирииһинэн наҕараадаланна.

Итини сэргэ Бүлүүтээҕи байаныыстар «Аккорд» бөлөхтөрө 9 профессионал-байаныыстар ансаамбылларын кытта тэҥҥэ киирсэн, 1 истиэпэннээх дипломант үрдүк аатын ылан үөрүүлэрэ-көтүүлэрэ үксээтэ.Байаан тутуурдаах уолаттарбытын үрдүк ситиһиилэринэн эҕэрдэлиибит, өссө да маннык ситиһиилэр кэлэ турдуннар! Дом!

Елена Туласынова,                                                                                                                                            

СӨ  култууратын туйгуна.