Бүлүү улууһун историятыгар киирбит 50 депутаттаах төрдүс ыҥырыылаах оройуоннааҕы Сэбиэт үлэтин түмүктүүр от ыйын 28 күнүгэр тэриллибит сессиятыгар депутаттарга элбэх наҕараада туттарылынна.
50 депутаттаах оройуон Сэбиэтэ икки ыҥырыыга талыллан, барыта, 10 сыл үлэлээтэ. Аны күһүҥҥү быыбарга оройуон Сэбиэтигэр икки төгүл аҕыйах — 25 депутаты талыахпыт.
Сессия үлэтин түмүктэниитэ оройуон Сэбиэтин бэрэссэдээтэлэ Гаврил Корякин 5 сыл бииргэ өйөһөн үлэлээбит кэллиэгэлэригэр истиҥ махтал тылларын анаата. Кини оройуоннааҕы Сэбиэт 5 сыл устата улуус социальнай-экономическай сайдыытыгар туһуламмыт элбэх быһаарыылары кэмигэр, сылын аайы улуус бүддьүөтүн хойутааһына суох ылынан испитин, барыта 42 сессия тэриллэн ыытыллыбытын, ол иһигэр, хамсык дьаҥа турбут, элбэх хааччах биллэриллибит кэмигэр оройуон Сэбиэтэ уонна улуус дьаһалтата бииргэ түмсүүлээхтик үлэлээбиттэрин бэлиэтээтэ.
Ол курдук, ааспыт 5 сылга улууска «Хаарбах дьиэттэн көһөрүү» бырагыраама харгыһа суох үлэлээбитигэр, элбэх социальнай хайысхалаах тутуу ыытыллыбытыгар оройуон Сэбиэтин депуттарын өҥөлөрө элбэх.
Улуус дьаһалтатын баһылыгын бастакы солбуйааччы Иван Евсеев оройуон Сэбиэтин депутаттарыгар махтанан элбэх үтүө тылы анаата уонна улуус дьаһалтата уонна 50 депутаттаах оройуон Сэбиэтэ улуус сайдарыгар бииргэ түмсэн үлэлээбиттэрэ үчүгэй түмүктэри биэрбитин тоһоҕолоон бэлиэтээтэ.
Бу дьоро күн оройуон Сэбиэтин депутаттарыгар элбэх Махтал суруктар, депутаттар Иван Алексеевка, Александр Григорьевка, Виктор Платоновка, Алексей Степановка «Улуус социальнай-экономическай сайдыытыгар кылаааттарын иһин» бэлиэлэр, Прокопий Протопоповка «Олохтоох бэйэни салайыныы сайдыытыгар кылаатын иһин» өрөспүүбүлүкэ бэлиэтэ үөрүүлээх быһыыга-майгыга туттарылыннылар.
Депутаттарга Чочу, Халбаакы, I Күүлэт нэһилиэктэрин дьаһалталарын, улуустааҕы үөрэх управлениетын, тыа хаһаайыстыбатын департаменын Махтал суруктара, сэмэй бэлэхтэрэ туттарылыннылар.
Николай Куприянов.