Тхэквондоҕа Бүлүү спортсмена күрэхтэһииттэн туораата

“Азия оҕолоро” VIII аан дойдутааҕы спортивнай оонньуулар күрэхтэһиилэрэ Дьокуускай куорат саҥа уонна өрөмүөннэммит 12 эбийиэгэр күргүөмнээхтик ыытылла тураллар. Бэҕэһээ “Эллэй Боотур” спорткомплекс Муус дыбарыаһыгар спорт олимпийскай көрүҥэр – тхэквондоҕа күрэхтэһиилэр саҕаламмыттара.

Бүлүү улууһун эдэр кэскиллээх спортсмена, Бүлүү куорат 2 №-дээх оскуолатын 9 кылааһын үөрэнээччитэ, тириэньэр Георгий Халабышев үөрэнээччитэ. Саха сирин II хамаандатын састаабыгар киирбит Рудольф Дорофеев 63 киилэ ыйааһын лидердарын — Казахстан уонна Узбекистан тхэквондистарын кытта киирсэн, күрэхтэһииттэн туораата. Улахан күрэхтэһиилэргэ кыттыы уопута аҕыйаҕа таайда диэххэ сөп.

Рудольф тхэквондо курдук Бүлүү улууһугар тэнийбэтэх көрүҥҥэ дьарыктанан, икки сыл иһигэр Саха сирин сүүмэрдэммит хамаандатыгар киирбитэ элбэҕи этэр. Кэлэр өттүгэр эдэр, кэскиллээх спортсмен Рудольф Дорофеевтан кыайыылары күүтэбит, эрэнэбит.

Тхэквондо аан бастаан “Азия оҕолоро” оонньууларын бырагырааматыгар 2004 сыллаахха киллэриллибитэ. Ис хоһооно 3 раунд устата атаҕынан тэбиэлээн ким элбэх очуокуну ылбыт ол кыайыылаах тахсар.

Быйылгы оонньууларга уолаттар уонна кыргыттар 10 ыйааһыҥҥа арахсан көмүс мэтээллэр иһин киирсэллэр. Бэҕэһээ 14 хамаанда 88 бастыҥ спортсменнара күүстэрин холостулар, ол иһигэр, Арассыыйа 6 хамаандатын, Азербайджан, Беларусь, Казахстан, Кыргызстан, Узбекистан, Палестина, Пакистан, Таиланд тхэквондистара кииристилэр.

Тхэквондоҕа элбэх ситиһиилээх Узбекистан хамаандата.

 

 

48 киилэҕэ Узбекистантан Бехруз Салимов, 55 кг Омадбек Отабеков, биһиги спортсмеммыт киирсибит ыйааһыныгар 63 кг Азербайджантан Васим Салимов кыайдылар. Рудольф утарылаһааччылара иккис-үһүс буоллулар. Тхэквондаҕа Саха сирин хамаандатыттан Наталья Лазарева боруонса мэтээли ылары ситистэ.

Бүгүҥҥү күн туругунан, уопсай түмүккэ 13 мэтээллээх Узбекистан хамаандата бастаан иһэр, иккискэ – 6 наҕараадалаах Уһук Илин федеральнай уокурук, үһүскэ – эмиэ итиччэ мэтээллээх Ураллааҕы федеральнай уокурук хамаандалара таҕыстылар.

Саха сирин хамаандата икки күн түмүгүнэн 5 мэтээллээх. Самбоҕа үрүҥ көмүс мэтээли Иван Лапушкин, боруонса мэтээллэри Дарья Шарапова, Сахая Корякина, Анастасия Шевченко ылбыттара.

Николай Куприянов.

Фото обложки: пресс-служба Дирекции «Дети Азии».

Читайте дальше