Ийэ күнүгэр анаан тэриллибит «Күндү ийэм, күн ийэм барахсан» өрөспүүбүлүкэтээҕи куонкуруска Туйаара Афанасьева-Туйаарыма «Ийэ» диэн хоһоонунан Гран-При ылан, кыайыылааҕынан ааттанна.
Туйаара Афанасьева-Туйаарыма Үгүлээттэн төрүттээх, билигин Дьокуускай куоракка олорор. Кэргэнин кытта 3 кыыс оҕону улаатыннаран, билигин 6 сиэннэрин бүөбэйдииллэр. Кини Н.Г.Чернышевскай аатынан Бүлүүтээҕи пед-кэллиэһи бүтэрэн баран өр сылларга Үгүлээккэ «Тугутчаан» оҕо уһуйааныгар үлэлээбитэ.
Туйаара Афанасьева-Туйаарыма хоһооннору 17 сааһыттан нууччалыы, сахалыы суруйар. Кини элбэх хоһооно ырыа буолбуттарын бэлиэтиэҕи баҕарыллар. Бастакы суруйбут «Хаар» диэн хоһоонун мелодист Валентина Яковлева –Чэлгийээнэ ырыа гынан көтүппүтэ.
Быйыл кини Дьокуускай куорат күнүгэр суруйбут «Уруйдан, Дьокуускай куоратым!» диэн хоһоонун мелодист Галина Ксенофонтова ырыа оҥорбута сүрэхтэннэ. Эмиэ ити күн үөрүүлээх тэрээһиҥҥэ Хатастан «Кэрэчээнэ» дьахталлар ансамбллара «Дэйбиир» ырыатын ыллаабыттара.
Ийэлэр күннэригэр Гран-При ылбыт «Ийэ» диэн хоһоон
Ким баарый бу сиргэ мичИйэ
Оҕотун бүөбэйдиир бэрИйэ
Сүрэҕэ үөрүүнэн битИйэ
Күн тэҥэ тапталын тэрИйэ
Кырачаан киһибит иһИйэ
Чуопчаарар саҥата ньимиИйэ
Ийэтин одуулуур минньИйэ
Илиитин даллатар килбИйэ
Сып сырдык иэйиитэ илгИйэ
Оҕоҕо тапталын илбИйэ
Сирдээҕи ааньалбыт бу – Ийэ
Күндүттэн күндүбүт бу – Ийэ
Туйаарыма.
Ийэҕэ аналлаах «Ийэҕэ мичээри бэлэхтиэх» диэн хоһооно эмиэ ырыа буолан Саха араадьыйатыгар сүрэхтэммитэ.
Быйыл Кыайыы күнүгэр СВО-ҕа сылдьар уолаттарга аналлаах «Саха буойуна» хоһооно өрөспүүбүлүкэтээҕи куонкуруска Гран-при ылбыта. Кини кэлиҥҥи сылларга үгүс куонкурустар кыайыылаахтарынан, дипломаннарынан буолар, хоһоонноро элбэх хомуурунньуктарга киирдилэр.
Туйаара Афанасьева-Туйаарыма нууччалыы-сахалыы суруйар элбэх хоһоонньуттар түмсүүлэрин үлэлэригэр көхтөөхтүк кыттар.
Туйаара Афанасьеваны-Туйаарыманы хоһоонньуттар таһымнаах куонкурустарыгар улахан кыайыытынан эҕэрдэлиибит, бары үтүөнү, айымньылаах үлэни баҕарабыт, саҥа хоһооннору кэтэһэбит!
Николай Куприянов.