Сэтинньи 16 күнүгэр Үгүлээт нэһилиэгин «Үнээкээн аартыга» түөлбэтэ маннык ыарахан кэмҥэ туора турбакка, тыылга баар хас биирдии киһи бэйэтин тус кылаатын киллэриэхтээх диэн, кыра да буоллар, үп-харчы киллэрээри түмсэн кэнсиэрт туруордубут.
Үгүс ыал, дьиэ кэргэн аҕалара, оҕолоро күн бүгүн эйэлээх, нус-хас олох туругурарын туһугар анал байыаннай дьайыыга ытык иэстэрин төлүү сылдьаллар, кэнсиэрпитин уолаттарбытыгар анаатыбыт.
Олохторун анал байыаннай дьайыыга дьоруойдуу толук уурбут буойуннары Афанасьев Василий Прокопьевиһы, Борисов Леонид Георгиевиһы, Винокуров Дмитрий Дмитриевиһы ахтан-санаан, кинилэр сырдык мөссүөннэригэр сүгүрүйэн туран, биир мүнүүтэ хоҥкуйан туруунан чиэстээтибит.
Уолаттарбыт төрөппүттэригэр маннык эр санаалаах дьиҥ патриоттары ииппиттэригэр сүһүөхтээх бэйэбит сүгүрүйэбит… Кинилэр ааттара кэлэр көлүөнэ ыччакка мэлдьи ахтылла турдун диэн нэһилиэк дьоно кыттыһаммыт өйдөбүнньүк мемориальнай дуоска туруорарга диэн этии киллэрдибит. Үөрэммит И.В. Яковлев аатынан Үгүлээт орто оскуолатыгар дьоруой паартата баара хайаан да ирдэниллэр дии саныыбыт. Кэнсиэртэн киирбит 20 тыһ. 350 харчыны анал байыаннай дьайыыга сылдьар уолаттарбытыгар ыытаары хамыыһыйаҕа туттардыбыт. Уолаттарбыт, мохсоҕоллорбут төрөөбүт дойдуларыгар этэҥҥэ, чэгиэн эргиллэн кэлэллэрин туһугар хоолдьуктаах бэйэбит хоҥкуйан тураммыт, айыыларбытыттан көрдөһүөҕүҥ! Иэдээннээх, идэмэрдээх сэрии тохтоотун! Туругурдун ил-эйэ эрэ!
Лена Мандарова, «Үнээкээн аартыга» түөлбэ салайааччыта.