И.Н.Ханды аатын сүгэр Тылгыны орто оскуолатыгар ыам ыйын 10 күнүгэр оскуола 5-11 кылааһын үөрэнээччилэригэр аналлаах кылаастарынан хор күрэҕэ ыытылынна. Күрэҕи 10 кылаас кэлэктиибэ салайан ыытта, кылаас салайааччыта Е.Х.Андреева.
Аҕа дойду Улуу сэриитэ бүппүтэ быйыл 79 сылын бэлиэтээтибит. Кыайыы. Кыайыы диэн тыл хайдахтаах курдук кэрэтик, өрө күүрүүлээхтик иһиллэрий? Бу биир тылтан араас истиҥ,хорсун санаалар үөскүүллэр.
Оскуолабыт иһигэр ыытыллыбыт хор күрэҕэр учууталлар, төрөппүттэр, үөрэнээччилэр көхтөөхтүк кытыннылар. Үөрэнээччи-учуутал-төрөппүт биир сомоҕо буолан үлэлээтэҕинэ, оҕолорбут олох киэҥ аартыгар уһуйуллан тахсалларыгар, олоххо бэлэмнээх буолаллар диэтэхпинэ, бука, сыыспатым буолуо. Мантан сиэттэрэн этиэхпин баҕарабын, бу хорга төрөппүттэр олус көхтөөхтүк кытыннылар, таҥас-сап бөҕө бэлэмнэнэн кэлбиттэрэ көрүөххэ олус үчүгэй.
Кыттааччылар бары уостан түспэт ырыалары ыллаан-туойан, дьоро киэһэни киэргэттилэр. «Хайыһар», «Три танкиста», «День Победы», «Священная война», «Тыыннаахтар умнубат сыллара», «Смуглянка» ырыалары толорон киэҥ биһирэбили ыллылар.
Хор түмүгэ маннык буолла: 3-с миэстэни — 6 кылаастар, кылаас салайааччыта Дмитриева Н.Н., 2-с миэстэни — 11-с кылаастар, салайааччы Алексеева Е.Н., 1-кы миэстэни 9-с кылаастар ыллылар, салайааччы Никифорова Е.Е., атын кылаастар көхтөөхтүк кытыннылар.
Дьүүллүүр сүбэҕэ ырыаһыт учууталларбыт: Алексеева Е.П., Колтовская С.С. сыаналаатылар. Нүөмэрдэр быыстарыгар Аҕа дойду сэриитин кэмигэр сыһыаннаах биктэриинэ ыытылынна. Сөптөөх хоруйу биэрбит үөрэнээччилэр минньигэс бэлэхтэринэн наҕараадаланнылар.
Дьэ, бу курдук олус үчүгэй тэрээһин Арассыыйаҕа Дьиэ кэргэн, Сахабыт сиригэр Оҕо саас, Тылгыныбыт нэһилиэгэр Аҕа сылларын чэрчитинэн ыытылынна. Хор киэһэтин тэрийбит, кыттыбыт оскуола бары үлэһиттэригэр, төрөппүттэргэ, үөрэнээччилэргэ махтанабыт. Кырыктаах сэрии хаһан да буолбатын, көмүс чыычаахтарбыт, оҕолорбут үрдүлэригэр өрүүтүн чаҕылхай күн чэмэличчи тыга турдун, сэрии алдьархайыгар кыттыыны ылбыт ытык дьоммутугар, эдэр-чэгиэн ыччаттар ааттарыттан барҕа, махтал тылларын аныыбыт.
Виталина Григорьева.
Хаартыскаҕа Алексеева Е.Н.,Осипова А.В. түһэриилэрэ.