Тылгыныга Үлэ, Эйэ, Маай бырааһынньыгын көрсө нэһилиэк тэрилтэлэрин икки ардыларыгар ыытыллар дьахталлар спартакиадалара ньиргийэн ааста.
Манна кыттааччылар успуорт 10 көрүҥэр илин-кэлин түһүстүлэр. Спартакиада арыллыытыгар Тылгыны нэһилиэгин баһылыгын солбуйааччыта Христина Дмитриевна Васильева спартакиада устуоруйатыттан кэпсээтэ, маннык тэрээһин нэһилиэккэ ыытыллара кэрэхсэбиллээх диэн санаатын эттэ. Кылаабынай судьуйанан Григорьев Т.В үлэлээтэ. Маны таһынан, хас көрүҥ аайы биирдии судьуйа үлэлээн күүс-көмө буоллулар. Саамай ыһыылаах-хаһыылаах көрүҥнэринэн волейбол уонна канат тардыһыыта буолла. Түмүккэ хамаанданан И.Н.Ханды аатынан орто оскуола»Кустук» хамаандата бастаан, грамотанан, кубогынан наҕараадаланна. 2-с миэстэни «Большая компания»диэн нэһилиэк араас тэрилтэлэриттэн турбут хамаанда ылла уонна 3-с миэстэни»Күнчээн»оҕо уһуйаанын хамаандата ылан грамотанан наҕараадаланнылар.
Хас көрүҥ аайы 1,2,3 миэстэлэри ылбыт дьахталлар грамотанан, мэтээлинэн наҕараадаланан үөрдүлэр-көттүлэр. Көрүҥ аайы биирдии анал номинацияны судьуйалар таланнар, грамота уонна сэмэй бириис туттарылынна.
Успуорт бырааһынньыгар «Бэриниилээх көрөөччү» диэн анал ааты 5 киһиэхэ биэрэн, грамотанан, сэмэй бирииһинэн наҕараадалаатыбыт.
Дьэ, бу курдук, спартакиада спортивнай күрэҕэ түмүктэннэ.
«Чэгиэн эт-хаан,чэбдик олох» дьахталлар спартакиадаларын култуурунай чааһа, ыам ыйын 1 күнүгэр «Түһүлгэ»сынньалаҥ киинигэр ыытылынна.
Күрэххэ уопсайа 6 кыттааччы 3 тэрилтэттэн кытынна, 6 түһүмэхтээх куонкуруска илин-кэлин түһүстүлэр. Хас түһүмэх аайы олус кыттааччылар олус чаҕылхайдар, күүскэ бэлэмнэммиттэрэ дьүүллүүр сүбэ уонна көрөөччү хараҕар тута быраҕыллар. Биһиги успуорду өрө тутар дьахталларбыт олус талааннаахтарын, минньигэс астаах хаһаайкаларын, имигэс үҥкүүһүттэрин, булугас өйдөөхтөрүн уонна киэһээҥҥи муодаҕа олус кэрэлэрин көрөн сөхтүбүт, дуоһуйдубут. Бииртэн биир талааннаах, кэрэ аҥаардар дьоро киэһэни киэргэттилэр.
Куонкурус кэмигэр «Күнчээн»оҕо үҥкүүтүн ансаамбылын үҥкүүһүттэрэ Васильев Ваня, Лущевская Ванесса, Герасимова Христина ырыанан уонна Айнат Иванович Кылабысов ыллаан-туойан киэргэттилэр. Дьүүллүүр сүбэҕэ тэрилтэлэртэн үс жюри үлэлээтэ, Григорьева В.В, Алексеева Е.П,Самсонова Л.В.
Саамай долгутуулаах түгэнинэн түмүгү таһаарыы буолла:
Көхтөөх кыттыыны ылбыттарын иһин наҕараадаланнылар — оскуола кэлэктиибин аатыттан Любовь Иванова, балыыһа үлэһитэ (холбоһук тэрилтэлэр) Юлия Алексеева.
3-с миэстэни оскуола үлэһитэ Мария Ильина,
2-с миэстэни холбоһук тэрилтэлэртэн Татьяна Лыткина, 1-кы миэстэни,»Күнчээн»оҕо уһуйааныттан Мария Тимофеева ыллылар уонна «Кылаан кыайыылаах» үрдүк аатын, «Күнчээн»оҕо уһуйаанын бэлэмнэнии бөлөҕүн иитээччитэ Ирина Иванова ылла. Бары кыттааччылар грамотанан, тэрилтэлэрэ туруорбут бириистэринэн наҕараадаланнылар. Кэрэ киэһэни бэлэхтээбит успуорт доҕордоох Тылгыныбыт кэрэ аҥардарыгар махтанабыт. Спартакиада спортивнай күрэхтэрин «Кийииттэр» түмсүүлэрэ, култуурунай чааһын «Түһүлгэ» сынньалаҥ киин үлэһиттэрэ тэрийэн ыыттылар. Тэрээһиҥҥэ көмөлөспүт бука бары дьоммутугар-сэргэбитигэр тэрийээччилэр ааттарыттан махталбытын тиэрдэбит. Дьахталлар спартакиадалара өссө сайда-үүнэ турарыгар баҕарабыт.
Виталина Григорьева.
Хаартыскаҕа Владислав Иванов түһэриилэрэ.