Тылгынытааҕы «Түһүлгэ» сынньалаҥ киинигэр Тимофей Сметанин «Лоокуут уонна Ньургуһун»пьесатыгар олоҕуран поп-фолк драма умнуллубат түгэни бэлэхтээтэ.
Улуу Кыайыы 80 сылын көрсө буойун, фронтовик, ыччат, оҕо-аймах тапталлаах суруйааччыта, бэйээтэ, Сметанин Тимофей Егоровиһы ахтан-санаан аастыбыт, кини талааныгар сүгүрүйдүбүт.
Дьоро киэһэни орто оскуола алын кылааһын учуутала, үтүөлээх учуутал, оҕо иитиитигэр өр сылларга айымньылаахтык үлэлии сылдьар, Тимофей Сметанин аймах балта, Кэбээйи улууһуттан төрүттээх кийиит Светлана Филипповна Мосова олус үчүгэйдик сиһилии кэпсээтэ, кини кэпсээниттэн көрөөччүлэр элбэҕи билбиттэрэ-көрбүттэрэ буолуо дии саныыбыт.
Чахчыта даҕаны, төһө да бу орто дойдуга кылгастык олордор Тимофей Сметанин үгүс дириҥ суолталаах айымньылары суруйан хаалларбыт талааннаах суруйааччы буолар.
«Лоокуут уонна Ньургуһун» диэн аатырбыт драматыгар олоҕуран, аныгылыы тыыннаан олус интэриэһинэй поп-фолк драманы сөҕө-махтайа көрдүбүт. Таптал — киһи-аймах истиҥ иэйиитэ, таптал баар буолан сир үрдүгэр олох баар буолар. Аан дойду литэрэтиирэтигэр араас суруйааччылар былыргыттан күн бүгүнүгэр диэри тапталы араастаан туойбуттара, хоһуйбуттара, эгэлгэ айымньылар айыллыбыттара. Саха литэрэтиирэтигэр оннук биир кэрэ айымньынан Тимофей Сметанин»Лоокуут уонна Ньургуһун» диэн драмата буолар. Бу драма саха сирин тыйаатырдарыгар элбэхтик турбута, киинэ уһуллан аар-саарга аатырбытын бары билэбит. Эдэркээн кыыстаах уол сэмэй тапталлара, истиҥ-иһирэх сыһыаннара көрөөччүнү уйадытар, элбэх санааны саҕар.
Устуоруйа быыһын сэгэтэн көрдөххө, Ньургуһуннаах Лоокуут тапталлара аан дойдуга аатырбыт Уильям Шекспир «Ромео уонна Джульетта» трагедиятыгар олус майгынныыр. Бу икки устуоруйа көрөөччүнү олус умсугутар, дууһатын таарыйар уонна ураты истиҥ иэйиини уһугуннарар. Манна биири бэлиэтиэхпин баҕарабын, бу улуу Шекспир айымньыта өйтөн таһаарыы эбит буоллаҕына, биһиги сахабыт сирин Ньургуһуннаах Лоокуута дьиҥ чахчы Орто Бүлүүгэ олорон ааспыт устуоруйа тыыннаах туоһулара буолаллар.
Драмаҕа оонньообут Күһэҥэй, Нараҕан, Баһыкка, Далбардаах, Мөлчөс, Нуннуур, Сэрбэкэ, Мардьааһай бука бары оруолларын бэркэ толордулар.
Аныгылыы туруоруллубут дириҥ ис хоһоонноох драманы «Түһүлгэ» сынньалаҥ киин кэлэктиибэ туруоран бар дьонноругар, көрөөччүлэргэ бэлэхтээбитин иһин махтанабыт.
Элбэх истиҥ-иһирэх тыллаах сахалыы ырыалар ылланнылар, ырыалары Иванова М.М., Матвеева Н.П., Самсонова Л.В. ыллаатылар, орто оскуола 10 с кылааһын үҥкүүһүт кэрэчээн кыргыттара: Кононова Мия, Тимофеева Карина, Поскачина Лаура үҥкүүнэн киэргэттилэр.
Маны таһынан, олохтоох бибилэтиэкэр бэлэмнээбит «Тимофей Сметанин-үйэлэргэ умнуллубат» быыстапкатын дьон-сэргэ көрдө.
Оруолларга оонньоотулар:
Ньургуһун-Ангелина Дмитриева
Лоокуут-Айнат Кылабысов
Күһэҥэй-Владислав Иванов,
Нараҕан-Владимир Максимов,
Баһыкка-Иван Прокопьев,
Далбардаах -Сахаяна Васильева,
Мөлчөс-Спартак Васильев ,
Нуннуур -Регина Соркомова,
Сэрбэкэ-Егор Васильев
Мардьааһай -Трофим Григорьев .
Дьэ бу курдук, тоһуттар тымныылаах тохсунньу ый биир дьоһун киэһэтэ сэргэхтик ааста. Кыайыы 80 сылынан норуот таптыыр, буойун суруйааччыта Тимофей Сметанин тапталы туойар дириҥ ис хоһоонноох айымньыта үйэттэн үйэҕэ, көлүөнэттэн көлүөнэҕэ бэриллэн, өлбөт-сүппэт үйэлэнэ турдун.
Виталина Григорьева.
Хаартыскаҕа Владислав Иванов түһэриилэрэ.