Балаҕан ыйын 27 күнүгэр нэһилиэкпитигэр Саха Өрөспүүбүлүкэтин Судаарыстыбаннаһын күнэ үлэ кэллэктииптэригэр сахалыы таҥастаах кэлэн, үлэлэрин саҕалаабыттарыттан саҕаланна. Маны сэргэ сэргэх тэрээһиннэр ыытылыннылар.
Ол курдук күнүс олохтоох дьаһалта аттыгар нэһилиэк олохтоохторо сахалыы таҥастаах хото мустан, сэлэлии хааман култуура уонна сынньалаҥ пааркатыгар үөрүүлээх тэрээһиҥҥэ муһуннубут. Тылгыны диэн нэһилиэкпит аатын суруйан нэһилиэк олохтоохторо флешмобка кытыннылар. Илиилэригэр Саха сирин былааҕын күөрэччи туппут флешмоб кыттыылаахтарын квадрокоптерынан уһуллулар. Бу кэнниттэн Арассыыйа уонна Саха сирин гиимнэрин,сүһүөхпүтүгэр туран иһиттибит.
Үөрүүлээх тэрээһиҥҥэ тэрилтэ салайааччылара нэһилиэкпит историятыттан быһа тардан кылгастык, интэриэһинэйдик, лоп-бааччы кэпсээн тыл эттилэр. Олохтоох дьаһалтаттан баһылык солбуйааччыта Христина Дмитриевна, оскуола салалтатыттан Евдокия Гаврильевна,оскуолаҕа киириэн иннинээҕи саастаах оҕо тэрилтэтиттэн Лилиана Владимировна, учаастактааҕы балыыһа кылаабынай бырааһа Любовь Августовна, «Кийииттэр»түмсүүлэрин салайааччыта Виталина Витальевна, нэһилиэк депутаттара уонна «Иэйэхсит» эбээлэр түмсүүлэрэ тыл этэн уонна хоһоон ааҕан олохтоохтору эҕэрдэлээтилэр. «Уолан»уолаттар ансаамбыллара, сахалыы иэйиилээхтик хоһоон ааҕан уонна Петр Николаев «Оһуокай» диэн ырыатын ыллаан үөрүүлээх тэрээһини киэргэттилэр. Судаарыстыбаннас күнэ оһуокайынан түмүктэннэ. Оһуокайы бэтэрээннэр Сэбиэттэрин бэрэссэдээтэлэ Петрова Людмила Прокопьевна таһаарда.
Үөрүүлээх тэрээһини «Түһүлгэ»сынньалаҥ киинин кэллэктиибэ (директор Р.Н.Иванова) салайан, бэлэмнээн ыытта. Бука бары нэһилиэкпит олохтоохторун өссө төгүл Сахабыт сирин Судаарыстыбаннаһын күнүнэн эҕэрдэлиибит. Бары биир сомоҕо буолан үлэлиэҕиҥ-хамсыаҕыҥ диэн ыҥырабыт. Саха буолан сандаарыаҕыҥ, саха буоларбытынан киэн туттуоҕуҥ.
Виталина Григорьева,
Тылгыны.