Тылгыны нэһилиэгин «Түһүлгэ» сынньалаҥ киинигэр «Тойон балык-2025» диэн нэһилиэк түөлбэлэрин икки ардыларыгар олус интэриэһинэй күрэх ыытылынна.
Оо, собо, собо барахсан! Биһиги өбүгэлэрбит собо балыгынан аһылыктанан, өл хабан, хоту сир тыйыс айылҕатыгар, ыарахан олоххо олорон күн бүгүнүгэр кэллэхтэрэ.
Бу ыытыллыбыт күрэххэ, нэһилиэкпит үс түөлбэтин, үстүү киһилээх хамаандалара илин-кэлин түсүһэн, көрөөччүлэргэ сонун киэһэни бэлэхтээтилэр.
Ол курдук бастакы түһүмэх — хамаандаларын билиһиннэрии. Манна түөлбэлэрин олоҕуттан, бастыҥ балыксыттарын, хамаандаларын билиһиннэрдилэр. Ордук үчүгэйдик «Эрэл» түөлбэ сиһилии билиһиннэрдэ.
Иккис түһүмэх — «Эмис собо». Манна хамаандаттан биирдии киһи тахсан, остуолга олорон ууга буспут собону ыраастык бириэмэҕэ сииргэ күрэхтэстилэр. «Эрэл»түөлбэттэн Николай Анисимов, «Баҕадьаан» түөлбэттэн Саина Васильева, «Кэнчээри» хамаандатыттан Сардана Петрова илин-кэлин түһүстүлэр. Саамай түргэнник уонна ыраастык сиэбит Николай Анисимов буолла.
Үһүс түһүмэх — «Астык балык»диэн дьиэҕэ сорудах этэ. Манна духовкаҕа ханнык баҕарар балыгы буһаран аҕалан киэргэтии сыаналанна. Кыттааччылар бары олус үчүгэйдик кытыннылар. 
Төрдүс түһүмэх — «Көмүс хатырык». Манна биир киһи бириэмэҕэ сордоҥ кыһар, икки киһи киэргэтэн уурар. Бу саамай интэриэһинэй түһүмэх буолла. Уолаттары кытта тэбис тэҥҥэ, сордоҥ кыһан «Кэнчээри»түөлбэ кэрэ куота Евдокия Долгунова бэркэ кыста.
Бэһис түһүмэх — «Киһи күннээх, балык ыамнаах». Манна түөлбэлэр балык туһунан хоһоон айбыттарын ааҕан иһитиннэрдилэр. «Баҕадьаан түөлбэ хоһоонун аата»Түҥ балыга», ааптара Николай Тимофеев-Куола Тылгыны,»Эрэл» түөлбэ хоһоонун Анна Матвеева суруйбут. Хоһоон аата «Дойдум собото остуолум бастыҥ аһа», «Кэнчээри» түөлбэбит хоһооно «Мулу эбэбит собото», ааптара Виталина Григорьева. Олус истиҥ тыллардаах хоһооннору истэн олус астынныбыт.
Алтыс түһүмэхпит «Үскэл балык» диэн. Түөлбэлэр саамай улахан соболорун уонна сордоҥнорун аҕалан ыйааһыннарын быһаардылар. Ол курдук «Кэнчээри» түөлбэ сордоҥо 10 кг 5 гр, соболоро 2 кг буолла. «Баҕадьаан» түөлбэ сордоҥо 9 кг 95 гр, собото 1 кг 15 гр, «Эрэл» түөлбэлэр сордоҥноро 7кг 25 гр, соболоро 1 кг 45 гр буолла.
Алта түһүмэхтээх күрэх түмүгүн билиһиннэрэбит, маннык анал ааттар бэрилиннилэр:
«Эмис собо»-Николай Анисимов,
«Астык балык»- Саина Васильева,
«Көмүс хатырык»-Дмитрий Филиппов,
«Үскэл балык»-Татьяна Шадрина,
«Бастыҥ хоһоон»-Людмила Петрова,
«Бастыҥ билиһиннэрии»-Александр Поскачин,
«Бастыҥ балыксыт»-Сардана Петрова,
«Бастыҥ асчыт»- Евдокия Долгунова,
«Бастыҥ көҕүлээччи» -Айталы Филиппова.
Уопсай түмүккэ 1 миэстэни — «Эрэл», 2-с миэстэ — «Кэнчээри», 3 миэстэ — «Баҕадьаан»түөлбэ буолан үөрдүлэр-көттүлэр.
Дьэ, бу курдук собо барахсаҥҥа сүгүрүйэн, өбүгэлэрбит төрүт астарын үйэтитэргэ анаан олус интэриэһинэй күрэх буолан ааста. Дьоро киэһэни ыраах Абый улууһуттан төрөөбүт дойдутугар күүлэйдии кэлэ сылдьар Николай Максимов ыллаан киэргэттэ, биир дойдулаахтарыгар ыллаан-туойан бэлэх уунна уонна оскуолабыт үөрэнээччилэрэ Оля Иванова, Люда Петрова, «Түһүлгэ»СК исписэлииһэ Айнат Кылабысов, эдэр кэскиллээх ырыаһыппыт Регина Соркомова киэргэттилэр.
Виталина Григорьева.