Кулун тутар 6 күнүгэр ааспыт 2023 сыл — үлэ сылын чэрчитинэн Бүлүү улууһун общественнай түмсүүлэрин сылы түмүктүүр тэрээһиннэрэ буолан ааста.
Бу киэҥ ыҥырыылаах тэрээһиҥҥэ улуус нэһилиэктэр түмсүүлэрэ, баһылыктара, улуус баһылыгын солбуйааччыта И.И. Евсеев, Бүлүү куоратын баһылыга Я.А. Попов, Ил Түмэн депутата А.Гоголев көмөлөһөөччүтэ М.И. Павлова, улуус бэтэрээннэрин Сэбиэтин бэрэссэдээтэлин солбуйааччы Ф.Ф.Николаев, ыалдьыттар — барыта 250 тахса киһи кыттыыны ылла.
Сылы түмүктүүр тэрээһини 11 төгүлүн Мария Петровна Томская иилээн-саҕалаан ыытта уонна сахалыы куттаах Сөдүөт алгыһынан арылынна. М. Н. Жирков аатынан култуура Дыбарыаһын киэҥ уораҕайын үрдүк сыанатыттан сахалыы таҥастаах Далбардар талба талааннарын көрдөрдүлэр. Түмсүүлэр үлэлэрэ үрдүктүк сыаналанан, араас таһымнаах наҕараадалар туттарылыннылар, анал ааттар иҥэрилиннилэр.
Чочу нэһилиэгиттэн баһылык солбуйааччыта Н .П. Евсеева, бэтэрээн Сэбиэтин бэрэсэдээтэлэ Г.А.Гоголева кытыннылар, “Утум ситимэ” түмсүү Далбардара кытыннылар. «Серебряный волонтёр” анал ааты ылла түмсүү салайааччыта З.Е.Петрова. Сааланы тилэри тардыллыбыт толору астаах сандалы тула олорон таптыыр ырыаһыппыт Лэгэнтэй ырыатынан ойон туран эдэр сааһы эргитэн, үҥкүүлээн даҕаны ыллылар. Бииртэн биир ырыаһыттар, үҥкүүһүттэр дьоро күнү ситэрэн биэрдилэр. Алгыстаах оһуокайы оройуттан тутан, үҥкүү тылынан эттэххэ, күҥҥэ тиийэ көтөн, ыйга тиийэ ыстанан, дьон-сэргэ сүргэлэрэ көтөҕүлүннэ. Билэр дьоннорун көрсөн үөрэн-көтөн, хаартыскаҕа түһэн астынан-дуоһуйан тарҕастылар.
Мария Буслаева.