Кэлиҥҥи сылларга төһө да уустук балаһыанньаҕа үлэлээтэр, кэккэ ситиһиилэри ситиспит Бүлүү улууһун саахымакка федерацията Бүлүүтээҕи оҕо спортивнай оскуолатыгар саахымат сиэксийэтэ арылларын туруорсар.
Бүлүү улууһугар саахымат оонньуутун сайдыыта бэйэтэ дириҥ силистээх-мутуктаах, баай историялаах. Сэбиэскэй кэмҥэ элбэх саахыматчыт кыттыылаах оройуон чемпионаттара, араас турнирдар ыытыллар этилэр. Бүлүү саахыматчыттара өрөспүүбүлүкэ чемпионаттарыгар тиийэ кытталлара, саахыматы таптааччы ахсаана сыллата элбээн иһэрэ.
Бүгүн төһө да уустук усулуобуйаҕа үлэлээтэрбит ити үгэс салҕанан бара турар диэххэ сөп. Билигин да саахымат күрэхтэһиилэригэр элбэх дьон кыттар, эдэр оҕолор киһини толкуйдатар оонньуунан үлүһүйэн туран дьарыктаналлар, турнирдарга ситиһиилээхтик кытталлар.
Элбэхтэн аҕыйах холобуру аҕаллахха, 2022 сыллаахха Бүлүү улууһун саахымакка хамаандата бэйэтин рейтининэн Уус Алдан улууһун Бороҕонугар тэриллибит Саха сирин норуоттарын VIII спартакиадатыгар кыттар чиэскэ тиксибитэ уонна өрөспүүбүлүкэ 10 күүстээх хамаандатын иһигэр киирбитэ. Спартакиадаҕа Бүлүү күүстээх саахыматчыта Василий Романов уонна уола маастарга хандьытаат Василий Романов, Николай Ефимов уонна Акулина Беляева кыттыбыттара. 34 улуустан 10 бастыҥ хамаанда иһигэр киириини ситиһии диэххэ сөп.
Быйыл үөрэнээччилэр Саха сиринээҕи спартакиадаларыгар 21 улуустан Бүлүү эдэр саахыматчыттара 2 миэстэни ылбыттара улахан ситиһии буолар.
Ити курдук, кэлиҥҥи сылларга саастаах да, эдэр да саахыматчыттар улахан күрэхтэһиилэргэ ситиһиилээхтик кытталлар. Ити улууска саахымат спорда сайдарын туоһулуур дии саныыбын.
Быйыл эбиитин бэйэбит дьиэлээх-уоттаах буолан үөрүүбүт үксээн, күүспүтүгэр күүс эбиллибит курдук буолла. Куорат баһылыгынан Ян Попов талыллыаҕыттан саахымат федерациятыгар болҕомто ууруллан эрэр диэн бөҕө санаалаах сылдьабыт. Кини улуустааҕы саахымат федерациятыгар куорат киинигэр, Мир уулуссаҕа, урукку «Вилюит» офиһыгар киэҥ-куоҥ хос биэрбитигэр махталбыт улахан. Түгэнинэн туһанан, куорат мэрин үлэтигэр ситиһиилэри баҕарабыт!
Урут Александр Шипков Бүлүү куорат баһылыгынан үлэлии олорон улууска, куоракка саахымат оонньуута сайдарыгар болҕомто ууран, Бүлүү куоратын Чернышевскай уулуссатыгар турар урукку мусуой дьиэтигэр федерацияҕа анаан хос биэрбитэ. Саахымат федерацията бэйэтэ үлэлиир дьиэлээх буолан элбэх күрэхтэһиилэри ыытара.
Куорат баһылыгынан Ньургустаан Афанасьев үлэлии олорон урукку мусуой дьиэтин тоҥоробут диэн биһигини хоспутуттан таһааран кэбиспитэ уонна хос биэрбэккэ, саахымат федерацията, саахыматы таптааччылар таһырдьа туран хаалбыппыт.
Саахыматчыттар ускул-тэскил да сылдьыбыппыт диэххэ сөп. Саахымат оонньуур остуолларбыт, тэриллэрбит таһырдьа хараллан турбуттара, кыһын күрэхтэһии ыытарбытыгар тымныыттан киллэрэр буолан миэбэлбит алдьаммыта-кээһэммитэ, элбэх тэрил алдьанара алдьанан, сүтэрэ сүтэн суох буолбута.
Куорат мэрэ Ян Попов биэрбит саҥа хоһугар остуолларбытын туруоран, оҥостон, элбэх кыттааччылаах Бүлүү куорат чемпионатын саас тэрийбиппит.
Бүлүү улууһун саахымакка федерацията Бүлүүтээҕи оҕо спортивнай оскуола филиалыгар быйыл саахымат сиэксийэтэ арылларын, тириэньэр ыстаата көрүллэрин туруорсар. Бииринэн, саахымат өссө сайдыа, хара-үрүҥ дуоскаларга элбэх эдэр ыччат оонньуо этэ. Оонньуон баҕалаах, саахымат комбинацияларын үөрэтиэн баҕалаах эдэр ыччат элбэх. Иккиһинэн, бириистэри үбүлээһин, саахыматчыттар улахан күрэхтэһиилэргэ барар-кэлэр харчылара бүддьүөттэн көрүллүө этэ.
Билиҥҥитэ бириистэри, бырайыаһы сороҕор бэйэм уйунабын, сороҕун спорткомитет бэрэссэдээтэлэ Гаврил Евсеев саахыматчыттары өйөөн эмиэ бэйэтин хармааныттан төлөһөрө үгүс. Биир сыл кинини кытта кыттыһан бэйэбит үппүтүнэн бастыҥ саахыматчыппытыгар убаһа бирииһин кытта туруорбуттаахпыт.
Түмүктээн эттэххэ, Бүлүү улууһугар саахымат спорда сайдарыгар, саҥа эдэр оонньооччулар ааттара ааттанарыгар ДЮСШ—ҕа саахымат сиэксийэтэ арыллара наада дии саныыбын.
Александр Григорьев, Бүлүү улууһун саахымакка федерациятынбэрэссэдээтэлэ.