2022 сыл олунньу 24 күнүттэн анал байыаннай дьайыы саҕаланан, дойдубут Президенэ Владимир Путин балаҕан ыйын 21 күнүгэр 647 №-дээх Ыйааҕынан, быстах хомууру биллэрбитэ. Быстах хомуурга ыҥырыллан, Ийэ дойдуларын көмүскүү барар биир дойдулаахтарбытыгар уонна кинилэр дьиэ кэргэттэригэр көмө оҥороору, балаҕан ыйын 29 күнүгэр Бүлүү куоратыгар “Бүлүү улууһа эһигинниин бииргэ!” диэн улуустааҕы көмө оҥорор пууну тэрийэн, биир дойдулаахтарбытыгар, Саха сириттэн Ийэ дойдуларын көмүскүү сылдьар буойуннарга тиһигин быспакка көмө оҥорон үлэлии сылдьабыт.
Саас-сааһынан кэпсиир буоллахха, 2022 сыллаахха биһиги Бүлүүбүт улууһуттан элбэх уол быстах хомуурга ыҥырыллан барбыта. Уолаттар барахсаттар хайдах таҥастаах киирбиттэрин курдук туох да мала-сала суох бараллар этэ. Улуус дьаһалтата суһаллык анал байыаннай дьайыыга ыҥырыллан барар биир дойдулаахтарбытыгар уонна кинилэр дьиэ кэргэттэригэр көмө оҥорор штабы тэрийэн, сонно тута мал-сал, ичигэс таҥас хомуйар акцияны оҥорон, куорат, нэһилиэк олохтоохторо күүстээхтик көмөлөспүттэрэ. Байаҥкамааттан барар уолаттарбытын сороҕор күҥҥэ иккитэ утары туттуллар малы-салы, ичигэс таҥас, үрүҥ көмүс волонтер Екатерина Герасимовна илиитин сылааһынан астаан аҕалбыт алаадьытын биэрэн атаартыыр этибит. Маҕаһыыннарга, ырыынакка таҥас наһаа ыарахан уонна уолаттарбытыгар сөптөөх байыаннай көстүүмнэр суохтар да этэ, ол иһин матырыйаал атыылаһан, бэйэбит тигиэххэйиҥ диэн түмсүүлэргэ этии киллэрбитим. Итини сэргэ түмсүүлэр бары харчынан кыттыһаммыт, улуус дьаһалтатын иһинэн быстах хомуурга барбыт дьоннорбутугар анаан тэриллибит фондатыттан 100 тыһыынча харчы көрүллэн, Дьокуускайтан матырыйаал, фурнитура атыылаһан аҕаламмыт улуус уопсастыбаннай түмсүүлэрэ 2022 сыл алтынньы ыйтан анал байыаннай дьайыыга кытта сылдьар уолаттарбытыгар ичигэс таҥастары тигэн саҕалаабыппыт. Онон уолаттарбытыгар түмсүү ийэлэрэ, эбэлэрэ илиилэрин сылааһынан тикпит таҥастарын, оҥоһуктарын биэрэр буолбуппут.
Өрөспүүбүлүкэҕэ ыытыллар акцияларга куруук кыттабыт, ол курдук “От мам Якутии с любовью”, “Мы вместе”, «Открытка солдату», «Теплая зима», “Сылаас таҥас” диэн акцияларга кыттан, араас көстүүмнэри, таҥастары тигэн, харысхаллары оҥортоон, харыстанар сиэккэлэри өрөн, утары туттуллар маллары атыылаһан, “Якутия с тобой” диэн көмөнү оҥорор пууҥҥа илдьэн туттарабыт.
Бүлүү улууһа эһигинниин бииргэ” диэн көмө оҥорор пууммут үлэ күнүгэр күн аайы сарсыарда 9-тан киэһэ 6-ҕа, үлэбит элбэх буоллаҕына сорох күн хойукка диэри, өрөбүлэ суох үлэлиибит. Биһиги пууммут хас да хайысханан үлэлиир.
Бастакы хайысхабыт —иистэнии
Дьыл кэминэн көрөн сөп түбэһэр таҥаһы, камуфляжнай халыҥ, чараас, плащевай, флисовай көстүүмнэри, кууркалары, сэлиэнчиктэри, толстовкалары тигэбит;- Трикотажнай, флисовай матырыйаалтан балаклава, бэргэһэ, үтүлүк, футболка;
- Ардахтан харыстанар пончалары;
- Сахалыы кэтинчэлэри, куллукулары;
- Ардахха илийбэт матырыйаалтан үс гына хомуллар, иһигэр халыҥ пенофоллаах, курдаах олбоҕу;
- Уолаттарбыт барахсаттар сиргэ сыталларыгар сылаас буоллун диэн 1,5 сантиметр халыҥнаах пенофол истээх, 2 метр уһуннаах, 60-65 сантиметр кэтиттээх плащевай матырыйаалтан ковриктары;
- Саа стволун ардахтан, бадараантан харыстыыр чехоллары;
- Харысхал угуллар мөһөөччүктэрин;
- Илизаров аппарааттаахтар атахтарыгар кэтэллэригэр анаан чараас, халыҥ кэтинчэлэри тигэбит.
- Биэрэн ыытар таҥастарбытын, малларбытын угарбытыгар анаан вещмешоктары тигэттиибит.
Иккис хайысхабыт — араас оҥоһуктары оҥоруу
1.Сиэлтэн харысхаллары;
2.Сиэлтэн угунньалары валяниелаан, өрөн оҥоруу;
3.Кыра дэйбиирдэри;
4.Блендажнай чүмэчилэри;
5.Уһуннук умайар испиискэлэри;
6.Армейскай душтары.
7.Розжигтары.
Үһүс хайысхабыт — эмтээх оттору, ыраастыыр күүстээх үүнээйилэри хомуйуу
Сайын аайы пуун үлэһиттэрэ бэйэбит, Бүлүүгэ үүнэр эмтээх оттору, ыраастыыр күүстээх үүнээйилэри хомуйан хатаран, анал мөһөөччүктэри тигэн, барытын онно уган бэлэмниибит. Ол мөһөөччүктэрбит биир өттүгэр харысхал бэлиэлээхтэр, биир өттүгэр Бүлүү улууһун гербэтэ.
Төрдүс хайысхабыт —өстөөх хараҕыттан, дронтан харыстанар сиэккэлэри, нашлемниктары өрүү
Техникаҕа, индивидуалкаҕа эҥин диэн тус-туспа, матырыйааллаах сиэккэлэринэн арааран, хас да араас схеманан харыстанар сиэккэлэри өрөбүт. Сиэккэ өрүүтүгэр нэһилиэк уопсастыбаннай түмсүүлэрэ киирэннэр, матырыйаалларын барытын ылан тахсаллар уонна нэһилиэк олохтоохторун кытары бары куолаан өрө охсон киллэрэллэр, куоракка тэрилтэлэр үлэһиттэрэ үлэлэрин бириэмэтигэр 1-2 чаас пууҥҥа кэлэн өрөн көмөлөһөллөр.
Бэһис хайысхабыт
Госпиталь үлэһиттэрин үлэлэрин чэпчэтэр наадатыгар уонна бааһырбыт байыастарбыт бэрэбээскилэнэллэригэр, укуолланалларыгар таҥастарын устарга, кэтэргэ эрэйдэммэтиннэр диэн ойоҕосторун сиигин оннугар липучканан туттарыллар ыстааннары, ис таҥастары, тигэбит. Ону таһынан атахтарын, илиилэрин эчэппиттэргэ көмө буоллун диэн валиктары, бубликтары, косточкалары, сыттыктары, копчиктарын анныгар угуллар ортотунан хайаҕастаах, иһигэр холлофайбер симиллибит сыттыктарын тигэбит. Косточка, бублик, валик уонна кыра сыттык иһигэр таҥаһы 1 сантиметр гына кырыйан угабыт, биир косточка, бублик, валик, сыттык иһигэр наһаа элбэх кырыллыбыт таҥас симиллэр эбит. Пуун үлэһиттэрэ, түмсүүлэр, “Алмазик” уһуйаан, Г.С. Донской аатынан 2 нүөмэрдээх оскуола үлэһиттэрэ кэлэн куруук көмөлөһөллөр.
Анал байыаннай дьайыы кыттыылаахтарыгар уонна кинилэр дьиэ кэргэттэригэр анаан көмө акциялары оҥоробут
Ол курдук Саҥа дьылга кинилэр оҕолоругар, минньигэс бадаарактары 27 ыалга хас биирдии оҕолоругар дьиэлэригэр илдьэн, эҕэрдэлээн туран туттартаабыппыт. Бу күннэргэ Үгүлээт нэһилиэгиттэн кэлбит сибиэһэй муҥха соботун улуус, куорат дьаһалталара уонна култуура киинэ 3 массыынаны биэрэннэр 106 ыалга дьиэлэригэр илдьэн кэһии гынан биэртэлээтибит.
Билигин “Кыайыы туһугар” диэн көмө оҥорор акцияны ыыта сылдьабыт
Бүлүү куоратыттан «Сардаана», “Алмазик”, “Бүлүүчээнэ”, “Солнышко” уһуйааннар үлэһиттэрэ, В.Г.Румянцев аатынан оҕо спортивнай оскуолатын, оҕо поликлиникатын коллективтара, М.Н.Жирков аатынан искусство оскуолата, Арыылаах нэһилиэгин олохтоохторо, Бүлүүтээҕи ГУП ЖКХ филиалын Чочутааҕы учаастага, Бөтүҥ нэһилиэгин олохтоохторо, “Мичил” уһуйаан, СХПК, “Арчы” сынньалаҥ киинэ, Г.Ф. Николаев аатынан оскуола, искусство оскуолатын Мастаахтааҕы филиала СВО-ҕа көмө, таҥас-сап, утары туттар наадалаах малы-салы, ас хомуйан аҕалан туттардылар. Чинэкэ нэһилиэгин дьаһалтата ас, таҥас, утары туттуллар малы-салы таһынан уу саппыкыларын, спальнай мешоктары, ковриктары, тапочкалары, тиэрмэстэри аҕалбыттар, итилэр уолаттарбытыгар олус наадалаахтар, онон маннык маллары нэһилиэнньэ өссө аҕалара буоллар диэн көрдөһүүлээхпит.
Бүлүүтээҕи Г.С. Донской аатынан 2 нүөмэрдээх орто оскуола 4 б кылааһын 23 үөрэнээччилэрэ, салайааччы Раиса Семеновна Ефремова, музыкальнай салайааччы Раиса Васильевна Торотоева анал байыаннай дьайыы кыттыылаахтарыгар улуустааҕы көмө оҥорор пууҥҥа кэлэн хас биирдиилэрэ байыастарга анаан оҥорбут уруһуйдарын, көмөлөрүн аҕалан туттардылар. Итиэннэ биһиэхэ анаан кэнсиэртээтилэр, ырыа бөҕөнү ыллаатылар, хоһоон аахтылар, хомуска, флейтаҕа оонньоотулар. Түмүккэ хас биирдиибитигэр махтал тыллаах бэйэлэрэ оҥорбут аккырыыккаларын, сэмэй бэлэхтэрин туттараннар биһигини олус долгуттулар да, үөртүлэр да. Үс сыл үлэлээбиппит тухары маннык соһуччу үөрүүлээх түгэни биһиэхэ ким да бэлэхтии илик этэ. Маннык үтүө санаалаах оҕолорго барыларыгар уонна кинилэри үөрэтэр-такайар учууталларыгар Раиса Семеновна Ефремоваҕа, Раиса Васильевна Торотоеваҕа көмө оҥорор пуун волонтердарын ааттарыттан улахан махталбытын тириэрдэбит, үөрэххитигэр, үлэҕитигэр үрдүк ситиһиилэри баҕарабыт.
Дойдуларын туһугар туруулаһа, аччыктыыры, тоҥору-сылайары аахсыбакка, өстөөх буулдьатын аннынан сылдьар уолаттарбытыгар, дойдуларын дьоно-сэргэтэ илиилэринэн сылааһынан тигиллибит таҥастарын, оҥорбут малларын-салларын, ис сүрэхтэриттэн астаммыт төрүт астарын тутан төһөлөөх үөрэллэрэ буолуой.
2022 сылтан Бүлүү улууһун анал байыаннай дьайыы кыттыылаахтарыгар көмө оҥорор пуун волонтердара аадырыстаах баһыылкалары биир
оҥорон ыыталыыбыт. Саҥа Дьыл иннинэ сэтинньигэ тоҥ астаах баһыылкалары ыыппыппытын бары туппуттара. Олунньу 5, 8 күннэригэр 68 уолга уонна 20 баһыылканы опорнай пууҥҥа аадырыстаан ыыттыбыт. Ол иннинэ Ростов госпиталыгар анаан оҥорбут баһыылкаларбытын уонна СВО-ҕа өрбүт сиэккэлэрбитин ыыппыппытын барытын туппуттара. 2024 сылга тыһыынча кэриҥэ харыстанар сиэккэ өрүллэн ыытылынна. Уоппускаҕа кэлэ сылдьар уонна контрагынан барар уолаттар бары биһигиттэн кэлэн таҥнан, уопсайа 40-ча араас малы-салы, уопсастыбаннай түмсүүлэр амарах санаалаах ийэлэрэрин, иистэнньэҥ уолаттарбыт илиилэрин сылааһынан тикпит көстүүмнэрин, таҥастарын, оҥорбут малларын, харысхалларын, өрбүт сиэккэлэрбитин барытын ылан бараллар. Дойдуларын туһугар туруулаһа, аччыктыыры, тоҥору-сылайары аахсыбакка, өстөөх буулдьатын аннынан сылдьар уолаттарбыт дойдуларын дьоно-сэргэтэ илиилэрин сылааһынан тикпит таҥастарын, оҥорбут малларын-салларын, ис сүрэхтэриттэн астаммыт төрүт астарын тутан төһөлөөх үөрэллэрэ буолуой. Биһиги үтүө санаанан салайтаран тикпит таҥастарбыт, оҥорбут харысхалларбыт, өрбүт харыстанар сиэккэлэрбит уолаттарбытын харыстыы-арчылыы, араҥаччылыы сырыттыннар, күүстэригэр күүс эптиннэр диэн алгыспытын аныыбыт.
Олунньу 15 күнүгэр үгэскэ кубулуйбут Бүлүү улууһун уопсастыбаннай түмсүүлэрин 2024 сылы түмүктүүр 13-с төгүлүн тэриллэр уонна анал байыаннай дьайыы кыттыылаахтарыгар көмө оҥорор пуун тэриллибитэ 3-с сылыгар аналлаах улахан тэрээһин М.Н.Жирков аатынан култуура Дыбарыаһыгар ыытыллар. Түгэнинэн туһанан, куруук күүс-көмө буолар уонна биһиги үлэбитин куруук киэҥ араҥаҕа сырдатар “Олох суола” хаһыат кылаабынай редакторыгар Изольда Николаевнаҕа, үлэһиттэригэр Муза Иннокентьевнаҕа, Николай Куприяновка, Галина Степановнаҕа, Сахалина Андреевнаҕа, Василина Васильевнаҕа улуустааҕы көмө оҥорор пуун волонтердарын аатыттан улахан махталбытын тириэрдэбит, үлэҕитигэр үрдүк ситиһиилэри баҕарабыт.
Мария Томская, Бүлүү куоратын бочуоттаах олохтооҕо, Бүлүү улууһун уопсастыбаннай түмсүүлэрин уонна СВО-ҕа көмө оҥорор пуун салайааччыта.